Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 284 Hüküm no: 229 Orijinal metin no: [73b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüsrev Bey b. Abdullah’ın kiracısı olduğu vakıf evin tamiri için ne kadar para harcadığının tespiti Haremeyn-i Şerîfeyn Evkāfı’ndan olup mahrûse-i İstanbul’da Cerrâhbaşı mahallesinde vâki‘ lede’l-ahâlî ma‘lûmü’l-hudûd olan menzilin müste’ciri olan işbu hâmilü’l-kitâb Hüsrev Bey b. Abdullah nâm kimesne meclis-i şer‘-i şerîfe gelip takrîr-i kelâm ve ta‘bîr ani’l-merâm edip bundan akdem menzil-i mezbûr harâba müşrif olup ta‘mîr ve meremmât muhtâc oldukda mukaddemâ evkāf-ı mezbûre mütevellîsi olan Hasan Bey b. Mehmed menzil-i mezbûru kendi mâlım ile ta‘mîr ve meremmât edip ve her ne binâ ve ihdâs edersem ettiğim binâ vakfın olup sarf eylediğim akçem vakfdan icâre-i mu‘acceleme mahsûb olmak üzere izin verilmeğin ben dahi menzil-i mezbûrda bir matbah ve be-hesâb-ı şatrancî kırk sekiz zirâ‘ bir dahlîz ve tûlen yirmi dört kadden üç zirâ‘ dolma duvar ve tûlen yirmi dört ve arzen üç zirâ‘ sakf-ı çatı ve tahta döşeme ve tahta perde ve be-hesâb-ı şatrancî doksan zirâ‘ taş kaldırım ve trabuzan ve asma çardağı ve dört zirâ‘ dolma duvar ve altı aded cam müceddeden binâ ve ihdâs eylediğimden gayri [su] kuyusunun duvarı münhedim olmak taş duvarı ve tuğla döşemeleri ve kenîfi tahliyyeye ve tahta perdeye muhtâc olmağın ta‘mîr ve meremmât etmişidim. Hâlâ kıbel-i şer‘den üzerine varılıp ne mikdâr akçeye tahammülü vardır keşf ve tahrîr olunması matlûbumdur dedikde savb-ı şer‘den Mevlânâ Mehmed Efendi ve Hâssa mi‘mârlardan Üstâd Ali b. Halil irsâl olunup zeyl-i kitâbda mastûretü’l-esâmî olan Müslimîn ile menzil-i mezbûrun üzerine varılıp bi’l-fi‘il evkāf-ı mezbûre mütevellîsi olan Veli Bey b. Abdullah nâm bevvâb-ı sultânî mahzarında keşf olundukda fi’l-hakīka menzil-i mezbûrda ebniye-i mezkûr müceddeden binâ ve ihdâs olunup ve su kuyusunun taş duvarları ve kenîfi ve tuğla döşemeleri ve ta‘mîr ve meremmât olunmağın bu cümleye sarf olunan taşın ve tuğla ve kireç ve horasanisinin ve tahtalarının merteklerinin ve camlarının ve mismârının ve neccâriyye ve ırgadiyye ve hammâliyesinin yirmi yedi bin beş yüz akçeye tahammülü vardır deyu mi‘mâr-ı mezbûr ve sâir ehl-i vukūf Müslimânlar ittifâk eylediklerini mevlânâ-yı mezbûr mahallinde tahrîr edip ba‘dehû meclis-i şer‘a gelip haber vermeğin mâ-hüve’l-vâkı‘ bi’t-taleb ketb olundu. Tahrîren fî-evâhiri Rebî‘i’l-âhir li-sene semân ve ışrîn ve elf. Şühûdü’l-hâl: Ahmed Bey b. Abdullah el-Bevvâb, Hüseyin Çelebi b. Ömer, Ahmed Çelebi b. Mehmed el-bevvâb, Mustafa Çelebi b. ( ), Ferhad Bey b. Abdullah el-bevvâb ve gayruhüm.