Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 294 Hüküm no: 239 Orijinal metin no: [76b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haremeyn Evkafı’ndan olup Hayreddin Efendi Vakfı olan evin mahalle imamı Yusuf Çelebi b. Behram tarafından tasarrufunun engellenmesi Mahmiye-i İstanbul’da Haremeyn-i Şerîfeyn Evkāfı’na bi’l-fi‘il mütevellî olan Veli Bey b. Abdülmennan nâm bevvâb-ı sultânî meclis-i şer‘a gelip takrîr-i merâm edip mahmiye-i merkūmede Paşakapı kurbünde Ca‘fer Ağa mahallesinde vâki‘ hesâb-ı şatrancî üzere sekiz yüz yirmi altı zirâ‘ arsa üzere mebnî fevkānî ve tahtânî üç beyti ve bi’r-i mâ ve kenîf ve cüneyneyi müştemil bir taraf İbrahim Usta b. Abdullah mülkü ve bir tarafı Receb Bey b. Abdullah mülkü ve tarafeyn-i tarîk-i âm ile mahdûd olan menzil mahalle-i merkūmede vefât eden Hayreddin Efendi b. ( ) nâm kādı hâl-i sıhhatinde mülkü iken evvelâ kendi nefsine ba‘dehû mahalle-i merkūme mescidine sâbıkā imâm iken vefât eden Abdülaziz Efendi’ye ve evlâdına ve evlâd-ı evlâdına ile’l-inkırâz ve ba‘de’l-inkırâz evvelen el-imâmü’l-müteveffâ el-merkūm fukarâ-i Haremeyn’e vakf ve şart edip hâlâ şart-ı vâkıf-ı mezbûr üzere menzil-i merkūm bi-cümleti’t-tevâbi‘ fukarâ-i mezbûrîne âid olmuşiken mescid-i merkūma hâlâ imâm olan Yusuf Çelebi b. Behram nâm kimesne menzil-i merkūm kendiye meşrûta olmak zu‘mu ile bi-gayrı vech-i şer‘î vaz‘-ı yed edip fukarâ-i mezbûrîn için beni zabt ve tasarrufdan men‘ eder hâlâ kıbel-i şer‘den üzerine varılıp vâki‘ hâl ahâlî-i mahalle-i merkūmeden tefahhus ve istihbâr ve haberleri tahrîr olunup menzil-i merkūmun vakıf için zabt ve tasarruf ettirilmesi matlûbumdur dedikde savb-ı şer‘den Mevlânâ Mustafa Efendi ve Hâssa mi‘mârlardan Üstâd Ali b. Halil irsâl olunup zeyl-i kitâbda mastûretü’l-esâmî olan Müslimîn ile mahall-i mezbûre varılıp vâki‘ hâl ahâlî-i mahalle-i merkūmeden tefahhus olundukda mahalle-i merkūme sâkinlerinden olup udûl-i Müslimînden olan el-Hâc Hasan Çelebi b. Ahmed ve el-Hâc Hüseyin b. Abdülmennan ve sâirleri meclis-i şer‘de imâm-ı merkūm Yusuf Çelebi mahzarında mütevellî-i merkūmun takrîr-i meşrûhuna muvâfık ve min-külli vech kabûle lâyık edâ-i şehâdet-i şer‘iyye eylediklerinde ba‘de ri‘âyeti şerâiti’l-kabûl şehâdetleri makbûle oldukda mûcebiyle imâm-ı merkūmun vaz‘-ı yedine tenbîh edip vâki‘ hâli mahallinde tahrîr ba‘dehû meclis-i şer‘a inhâ ve takrîr etmeğin menzil-i merkūmu müheyyâ vakıf için zabt ü rabt etmeğin mütevellî-i merkūma te’kîd olunup mâ-vaka‘a sebt olundu. Fî-evâhiri Zilhicceti’ş-şerîfe min-şühûri sene semân ve ışrîn ve elf el-hicriyye. Şühûdü’l-hâl: el-Hâc Mustafa b. ( ) el-müezzin, Yusuf Çelebi b. Ahmed el-cündî, Mehmed Dede b. Hüdâverdi, Ali b. Hızır, Mehmed b. Gazanfer el-bevvâbü’s-sultânî, Piyale b. Abdullah, Osman b. Abdullah, Mustafa Bey b. Mehmed el-kâtib, Mehmed b. Abdullah el-bevvâb, Mehmed b. Süleyman ve gayruhüm.