Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 297 Hüküm no: 242 Orijinal metin no: [77a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Çavuş b. Abdülmennan’ın küçük çocuklarının ihtiyaçlarını karşılamak için babalarından kalan evin vasileri tarafından Râziye bt. Davud’a satılması Mahmiye-i İstanbul’da Dizdâriye mahallesi sâkinlerinden iken bundan akdem vefât eden Mehmed Çavuş b. Abdülmennan’ın sulbî sagīr oğlu Mehmed ve sulbiye sagīre kızları Râbia ve Nesli’nin kıbel-i şer‘den mansûb vasîleri olan el-Hâc Ahmed b. ( ) nâm kimesne meclis-i şer‘-i hatîrülâzımü’t-tevkīrde mahalle-i mezbûre sâkinelerinden fahrü’l-muhadderât Râziye bt. Davud nâm hatun mahzarında bi’l-vesâye ikrâr-ı tâm ve takrîr-i kelâm edip Haremeyn-i Muhteremeyn Vakfı’ndan olup mahalle-i mezbûrede vâki‘ iki tarafı yine vakf-ı mezbûr ile ve bir tarafı ( ) ve bir tarafı tarîk-i âm ile mahdûd olup bundan akdem müteveffâ-yı mezbûr Mehmed Çavuş’un tasarrufunda olan altı bâb fevkānî oda ve bir tahta-pûş ve bir kilâr ve bir ahırı müştemil menzilin ba‘de vefâtihî hakk-ı tasarrufu bi-hasebi’l-kanun evlâd-ı sıgārîn-i mezbûrîn Mehmed ve Râbia ve Nesli ve Ümmühânî’ye intikāl edip mezbûre Ümmühânî fevt olup menzil-i mezbûrda olan rub‘ hisse-i şer‘iyyesinin hakk-ı tasarrufu vakf-ı mezbûra âid olup ve selâse-i erba‘ının hakk-ı tasarrufları mezbûrûn Mehmed ve Râbia ve Nesli’nin olup lâkin sıgār-ı mezbûrînin nafaka ve kisveye eşed ihtiyâcları olup müteveffâ-yı merkūm Mehmed Çavuş’un akār ve menkūl kısmından nafaka ve kisvelerine harc ü sarf olunmak menzil-i merkūmdan gayri terekesi olmayıp zarûret-i nafakaları için hakk-ı tasarrufları âhara tefvîz olunmak lâzım olmağın menzil-i mezbûr tâlibîne arz olunup ragabât-ı nâs münkatı‘a oldukdan sonra mezbûrûnun menzil-i mezbûrda olan hisse-i mu‘ayyenelerinin hakk-ı tasarrufları mezbûre Râziye Hatun üzerinde yirmi bir bin fıddî akçede karâr edip ziyâde ile tâlib-i âhar zuhûr etmemeğin ben dahi mezbûrînin menzil-i mezbûrda olan hakk-ı tasarruflarını zarûret-i nafakaları için vesâyetim hasebi ile mezbûre Râziye Hatun’a meblağ-ı merkūm yirmi bir bin fıddî akçeye hakk-ı tasarruflarını tefvîz edip ol dahi vech-i meşrûh üzere tefevvüz ve kabûl eyledikden sonra mukābele-i tefvîzde olan meblağ-ı merkūm yirmi bir bin akçeyi mezbûre Râziye Hatun yedinden bi’t-tamâm ve’l-kemâl ahz u kabz eyledim ba‘de’l-yevm zikr olunan menzil-i mezbûre Râziye Hatun’un tefvîz olunmuş mülküdür keyfe mâ yeşâ mutasarrıfe olsun dedikde vasiyy-i mezbûrun vech-i muharrer üzere cârî olan ikrârını el-mukarrun leha’l-mezbûre Râziye Hatun bi’l-müvâcehe tasdîk etmeğin mâ-vaka‘a bi’t-taleb ketb olundu. Tahrîren fî-evâsıtı Rebî‘i’l-evvel li-sene tis‘a ve ışrîn ve elf. Şühûdü’l-hâl: Abdi Bey b. Hasan el-cündî, Mahmud Çelebi el-bevvâbü’s-sultânî, el-Hâc Ahmed b. Hasan, Kaya b. Abdullah, Abbas b. Receb.