Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 298 Hüküm no: 243 Orijinal metin no: [77a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Bey b. Hasan tarafından Haremeyn-i Şerîfeyn Vakfı’ndan olup tamirini yaptırdığı ev için harcadığı paranın keşf ve tespiti Mahmiye-i Galata hâricinde el-Hâc Memi mahallesi sâkinlerinden işbu hâmilü’l-kitâb Mustafa Bey b. Hasan nâm bevvâb-ı sultânî meclis-i şer‘-i hatîr-ü lâzımü’t-tevkīrde takrîr-i kelâm ve ta‘bîr-i mâ-hüve’l-merâm edip Haremeyn-i Şerîfeyn Vakfı’ndan olup mahalle-i merkūmede vâki‘ lede’l-ahâlî ve’l-cîrân ma‘lûmü’l-hudûd olup icâre-i mu‘accele ve müeccele ile tasarrufumda olan menzilin mürûr-ı eyyâm ile etrâf-ı selâsesinde olan havlusunun bazı mevâzi‘i temelinden bi’l-külliye münhedim <> ve bazı mevâzi‘i câ be-câ harâba müşrif olup müceddeden binâ ve ta‘mîre muhtâc oldukda bundan akdem kendi mâlımdan harc ü sarf eylediğim akçe cânib-i vakfdan icâre-i <> müecceleye mahsûb olmak üzere mevâzi‘-i merkūmeyi imâret ve meremmet eylemiş idim. Hâlâ kıbel-i şer‘den üzerine varılıp ve ne mikdâr akçeye tahammülü vardır keşf ve tahrîr olunup harc eylediğim meblağ icâre-i müecceleye mahsûb olmak matbûbumdur dedikde savb-ı şer‘den Mevlânâ Hasan b. Osman ve Hâssa mi‘mârlardan Üstâd Ali b. Halil irsâl olunup zeyl-i kitâbda mastûretü’l-esâmî olan Müslimîn ile [77b] mahall-i mezbûra varılıp mütevellî-i vakf-ı mezbûr mahzarında keşf ve müşâhede olundukda fi’l-hakīka meblağ-ı [menzil-i] merkūmun etrâf-ı selâsesinde olan havlu duvarının bazı mevâzi‘ müceddeden ve bazı mevâzi‘ câ be-câ ta‘mîr olunmuş bulunup cümleden temel taşları ve üzerinin hatılları ve direkleri ve kuşakları ve sâir kereste-i mütenevvi‘asının üstâdiyye ve ırgadiyye ve hammâliyesinin ba‘de külli’l-hesâb üç bin üç yüz akçeye tahammülü vardır deyu mi‘mâr-ı mezbûr ve sâir ehl-i vukūf Müslimîn tahmîn-i sahîh ile tahmîn edip ittifâk ettikleri mevlânâ-yı mezbûr mahallinde tahrîr edip ba‘dehû meclis-i şer‘a gelip haber vermeğin mâ-vaka‘a bi’t-taleb ketb olundu. Tahrîren fî-evâili şehri Rebî‘i’l-âhir li-sene tis‘a ve ışrîn ve elf. Şühûdü’l-hâl: Ahmed Çelebi Elmalı, Ferhad Bey b. Abdullah el-bevvâb, Mustafa Çelebi el-kâtib, Ahmed b. Resul.