Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 301 Hüküm no: 248 Orijinal metin no: [78b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Çavuş b. Mezid’in Midilli’nin Kato Tritos köyünde bulunan ev ve bahçe vakfı Atebe-i aliyye-i sultâniyyede hâlâ Dârüssaâdeti’ş-şerîfe ağası olup bi’l-fi‘il Haremeyn-i Şerîfeyn Evkāfı nâzırı olan iftihârü’l-havâs ve’l-mukarrebîn muhtâru ashâbi’l-izzi ve’t-temkîn mu‘temedü’l-mülûk ve’s-selâtîn enîsü’l-hazreti’l-aliyyeti’l-hâkâniyye celîsü’s-sa‘âdeti’s-seniyyeti’s-sermediyye zü’l-kadri’r-refî‘ ve’l-câhi’l-menî‘ el-mahfûf bi-sunûfi avâtıfi’l-meliki’l-mübîn el-Hâc Mustafa Ağa b. Abdulmuin hazretleri meclis-i şer‘-i şerîf-i garrâda bâ‘isü hâze’l-kitâbi’l-müstetâb mefharü’l-cüyûş ve’l-kā’idîn Ali Çavuş b. Mezid nâm kā’id-i sultânî mahzarında bi’n-nezâre ikrâr-ı tâm ve takrîr-i kelâm edip kazâ-i cezîre-i Midilli sükkânından sâhibü’l-hayrât ve’l-hasenât merhûm Sinan Çelebi b. ( ) nâm kimesne hâl-i hayât ve kemâl-i sıhhatinde iken kazâ-i mezbûr muzâfâtından Kato Tritos nâm karye kurbünde Aya Marine demekle ma‘rûf mevzi‘de vâki‘ lede’l-ahâlî ve’l-cîrân ma‘lûmü’l-hudûd olup dört bâb tahtânî ve bir bâb fevkānî evleri ve bir kulleyi ve eşcâr-ı müsmire ve gayr-i müsmireyi hâvî mülk bahçesini ve bağ ve çayırını ve yine mevzi‘-i mezbûrede vâki‘ inde’l-ahâlî ve’l-cîrân ma‘lûmü’l-hudûd olup hâriciyyesi iki bâb fevkānî ve üç bâb tahtânî evleri ve ahırı ve bağ ve değirmeni ve samanlığı ve dâhiliyyesi üç bâb fevkānî ve üç bâb tahtânî evleri ve bir kilârı ve bir fırını ve eşcâr-ı müsmire ve gayr-i müsmireyi müştemil mülk bahçesini cemî‘-i tevâbi‘ ve levâhıklarıyla vakf ve habs ve şart ve ta‘yîn edip ribh ve gallelerini ve tasarruflarını evvelâ kendi nefsine ba‘dehû zevcesi Fâtıma Hatun bt. ( ) ve ba‘dehâ evlâdına evlâd-ı evlâdına ve ba‘de’l-inkırâz atîk ve atîkasına ve evlâdlarına ve evlâd-ı evlâdlarına şol şart üzere ki; hâsıl olan mahsûllerinden on iki bin akçesi Medîne-i Münevvere fukarâsı için nâzırı olan Dârüssaâde ağasının her sene hazînesine îfâ ve teslîm ve üç bin akçesi imâret ve meremmetlerine harc u sarf oluna ve ba‘de’l-inkırâz cümlesi Medîne-i Münevvere fukarâsına şart ve ta‘yîn edip hâlâ mezbûr Sinan Çelebi ve mezbûre Fâtıma Hatun ve evlâdı ve evlâd-ı evlâdı münkarız olup utekādan Âişe bt. Keyvan ve Temennâ bt. Abdullah ve Ferhad b. Abdullah ve Rıdvan b. Abdullah nâm kimesnelere minvâl-i mersûm üzere intikāl edip lâkin mezbûrûn kimesneler fakīrü’l-hâl olup ve zikirleri sebk eden bahçeler dahi mürûr-ı eyyâm ile harâba müşrif olup imâret ve meremmete kudretleri olmamağla her birisi zikr olunan bahçeleri bir kimesneye deruhde olunup on iki bin akçesi Medîne-i Münevvere fukarâsına îsâl ve üç bin akçesi imâret ve meremmetlerine sarf ve beş bin akçesi cümlemize verilmek evlâ ve enfa‘dır deyu mukır ve mu‘terif olduklarına kazâ-i mezbûr kādısı Mevlânâ es-Seyyid Fahreddin Efendi imzâsıyla mümzâ ve hatemiyle mahtûm arz gelmeğin hâlâ ben dahi nezâretim hasebiyle zikr olunan bahçelerin mahsûlâtlarını târîh-i kitâbdan yirmi bin akçeye her senesine tâlibi olan müşârun-ileyh Ali Çavuş’a meblağ-ı mezbûrdan her sene on iki bin akçesini nezâretim hasebiyle bana teslîm ve üç bin akçesini imâret ve meremmetlerine sarf ve beş bin akçesini mezbûrûn utekāya teslîm etmek üzere deruhde eyledim ol dahi vech-i muharrer üzere ta‘ahhüd ve iltizâm ve kabûl eyledi min-ba‘d mutasarrıf olsun dedikde gıbbe’t-tasdîk mâ-hüve’l-vâkı‘ gıbbe’t-taleb sebt olundu. Hurrire fî-evâili şehri Cumâdelâhire li-sene tis‘a ve ışrîn ve elf.