Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 300 Hüküm no: 247 Orijinal metin no: [78a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Çavuş b. Abdülmennan’ın kiracısı olduğu vakıf eve tamir için ne kadar para harcadığının tespiti Haremeyn-i Şerîfeyn Evkāfı’ndan olup mahmiye-i İstanbul’da merhûm ve mağfûrun-leh Ebulfeth Sultan Mehmed Hân-ı Gâzi -aleyhi’r-rahmeti’l-Bârî- Câmi‘-i şerîfi kurbünde Harâçcı mahallesinde vâki‘ lede’l-ahâlî ve’l-cîrân ma‘lûmü’l-hudûd olan menzilin yevmî üç akçe icâre-i müeccele ve icâre-i mu‘accele ile müste’ciri olan işbu sâhibü’l-kitâb mefharü’l-cüyûş Mustafa Çavuş b. Abdülmennan meclis-i şer‘-i şerîf-i tâhire gelip takrîr-i kelâm ve ta‘bîr ani’l-merâm edip bundan akdem menzil-i mezbûr münhedim olup tecdîde muhtâc oldukda izn-i şer‘le ve ma‘rifet-i mütevellî ile icâre-i mu‘acceleme mahsûb olmak üzere kendi mâlım ile fevkānî iki bâb oda ve bir şehnişîn ve bir kenîf müceddeden binâ eylemişdim. Hâlâ kıbel-i şer‘den üzerine varılıp eylediğim binânın ne mikdâr akçeye tahammülü vardır keşf olunmasını taleb ederim dedikde savb-ı şer‘den Mevlânâ Hızır Efendi b. Memi el-Kādî ile Hâssa mi‘mârlardan Üstâd Hasan b. Hüseyin irsâl olunup onlar dahi zeyl-i kitâbda mastûretü’l-esâmî olan bî-garaz Müslimîn ile menzil-i mezbûrun üzerine varıp evkāf-ı mezbûreye bi’l-fi‘il mütevellî olan fahrü’l-eşbâh Veli Bey b. Abdullah nâm bevvâb-ı sultânî mahzarında keşf ve müşâhede ettiklerinde fi’l-vâki‘ menzil-i mezbûrun arsası üzerinde binâ olunan oda ve şehnişîn ve kenîfin iki tarafdan tûlen ve kadden be-hesâb-ı şatrancî elli altı zirâ‘ taş duvar ve be-hesâb-ı şatrancî üç yüz zirâ‘ dolma duvar ve kadden altı zirâ‘ nerdübân dört demir pencere ve yüz zirâ‘ tahta döşeme ve on üç şeşhâne cam ve iki kapı ve dört dolab ve üç tarafdan kilârı ve bir buhârî ve bir ocak ve bir ocak taşı ve bir şehnişîn ve altmış altı zirâ‘ şeşhâne ve şatrancî tavan ve yüz otuz zirâ‘ sakf müceddeden binâ olunmuş bulunmağın bu cümleye harc olunan taşlarının ve dirkelerinin ve merteklerinin ve tahtalarının ve kiremidlerinin ve pedavralarının ve kireç ve horasanisinin ve mismârının ve tuğlasının ve sâir kereste-i mütenevvi‘asının ve üstâdiyye ve ırgadiyye ve hammâliyesinin cem‘an otuz beş bin iki yüz elli akçeye tahammülü vardır deyu mi‘mâr-ı mezbûr ve sâir ehl-i vukūf Müslimânlar ittifâk eylediklerini mevlânâ-yı mezbûr mahallinde tahrîr edip ba‘dehû meclis-i şer‘a gelip ihbâr etmeğin mâ-hüve’l-vâkı‘ alâ-vukū‘ihi gıbbe’t-taleb sebt olundu. Hurrire fî-evâili şehri Cumâdelûlâ li-sene tis‘a ve ışrîn ve elf. Şühûdü’l-hâl: Kıdvetü’l-ulemâ Mehmed Efendi b. Sinan el-müderris, umdetü’l-muhakkıkīn Ahmed Efendi b. ( ) el-müderris, fahrü’l-müdderrisîn Mehmed Efendi, fahrü’l-kuzât Uzun Muslihiddin Efendi, fahrü’l-kuzât Bodur Mehmed Efendi, Derviş Çelebi b. ( ) el-kâtib, Mustafa Beşe b. Abdullah er-râcil, Mustafa Beşe b. Mehmed er-râcil, Uzun Molla Ali el-müsta‘id ve gayruhüm.