Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 304 Hüküm no: 252 Orijinal metin no: [79a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Paşa Hatun bt. Mustafa Çavuş’un Kasımpaşa Cezeri mahallesinde bulunan vakıf evin kullanım hakkını Mustafa Ağa b. Veli’ye bıraktığı Dârü’s-saltanati’s-seniyye Kostantıniyyetü’l-mahmiye sâkinelerinden fahrü’l-muhadderât Paşa Hatun bt. Mustafa Çavuş tarafından husûs-ı âti’l-beyânı ikrâra vekîl olup mezbûre Paşa Hatun’u ma‘rifet-i şer‘iyye ile ârifeyn olan fahrü’l-akrân Osman Ağa b. Veliyyüddin ve zahrü’l-emâsil Abdülcelil Çelebi b. Abdi şehâdetleri ile şer‘an vekâleti sâbite olan atebe-i aliyye ve südde-i seniyye müteferrikalarından iftihârü’l-emâcid ve’l-ekârim karındaşı Ali Ağa b. Mustafa Çavuş el-mezbûr meclis-i şer‘-i şerîf-i garrâ ve mahfil-i dîn-i münîf-i zehrâda mahmiye-i mezbûre sükkânından işbu sâhibü’l-kitâb umdetü’l-ekâbir ve’l-ekârim zîdetü’l-efâhir ve’l-efâhim Mustafa Ağa b. Veli cânibinden kaziyye-i <<âtî>> câ’iyyetü’l-beyânı tasdîka vekîl olup fahrü’l-emâsil ve’l-akrân Mahmud Çelebi b. Veli ve zahrü’l-eşbâh Hasan Bey b. Abdullah şehâdetleri ile şer‘an vekâleti sâbite olan fahrü’l-emâsil ve’l-eşbâh Mehmed Bey b. Yusuf nâm bevvâb-ı sultânî mahzarında bi’l-vekâle ikrâr ve ta‘bîr ani’l-merâm edip Haremeyn-i Şerîfeyn vakfından olup mahmiye-i mezbûrede Kasımpaşa’da Cezerî mahallesinde vâki‘ dâhiliyye ve hâriciyye iki muhavvatayı hâvî bir muhavvatası bir ahır ve iki fevkānî oda ve bir selâmlığı ve bir muhavvatası dahi dört bâb tahtânî ve bir bâb fevkānî evleri ve bir kilârı ve bir kenîf ve bir matbah ve iki sofa ve bir su kuyusunu müştemil bir tarafı Murad Bey mülkü ve bir tarafı Canfeda Hatun mülkü ve bir tarafı vakf-ı mezbûr ve bir tarafı tarîk-i âm ile mahdûd [79b] menzili cemî‘-i tevâbi‘ ve levâhıkı ile yevmî üç akçe icâre-i müeccele ve ücret-i mu‘accele ile müvekkilem mestûre Paşa Hatun’un tasarrufunda olmağın menzil-i mezbûrun hakk-ı tasarrufunu mütevellî-i vakf-ı mezbûr <> ma‘rifeti ile müvekkile-i mezbûre Paşa Hatun müvekkil-i mûmâ-ileyh Mustafa Ağa’ya elli bin nakd-i râyic fi’l-vakt Osmânî akçeye tefvîz edip ol dahi tefevvüz eyledikden sonra mukābele-i tefvîzde olan meblağ-ı mezbûr elli bin akçeyi müvekkilem mestûre Paşa Hatun müvekkil-i merkūm Mustafa Ağa yedinden bi’t-tamâm ve’l-kemâl alıp kabz eyledi dedi dedikde vekîl-i mezbûrun bi’l-vekâle cârî olan ikrârını vekîl-i merkūm Mehmed Bey dahi bi’l-vekâle vicâhen tasdîk etmeğin mâ-hüve’l-vâkı‘ gıbbe’t-taleb sebt olundu. Hurrire fî-evâsıtı şehri Şevvâli’l-mükerrem li-sene tis‘a ve ışrîn ve elf. Şühûdü’l-hâl: eş-Şeyh Mustafa b. Celaleddin, Abdurrahman b. Abdülhay, eş-Şeyh Yusuf b. Abdülkadir, İbrahim Bey b. ( ) Mataracı, Mahmud b. Ali, Hasan b. Abdullah, Hamza el-bevvâbü’s-sultânî, Yusuf b. Kurd, Kasım b. Abdullah, Mahmud Veli ve gayruhüm.