Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 305 Hüküm no: 253 Orijinal metin no: [79b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’da Kızıltaş’ta kiracısı olduğu vakıf evi tamir eden Hızır Ağa b. Abdülvehhab’ın ne kadar masraf yaptığının tespiti Haremeyn-i Muhteremeyn Evkāfı’ndan olup mahmiye-i İstanbul’da Kızıltaş mahallesinde vâki‘ lede’l-ahâlî ve’l-cîrân ma‘lûmü’l-hudûd olan menzilin yevmî üç akçe icâre-i müeccele ve mu‘accele ile müste’ciri olup Hâssa aşçıların bölükbaşı olan bâ‘isü’l-kitâb Hızır Ağa b. Abdülvehhab meclis-i şer‘de bi’l-fi‘il vakf-ı mezbûr mütevellîsi olan fahrü’l-akrân Veli Bey b. Abdülmennan nâm bevvâb-ı sultânî mahzarında takrîr-i kelâm ve ta‘bîr ani’l-merâm edip bundan akdem menzil-i merkūm mürûr-ı eyyâm ile bi’l-külliye münhedim oldukda izn-i şer‘ ve ma‘rifet-i mütevellî-i merkūm ile mu‘acceleme mahsûb olmak üzere kendi mâlımdan müceddeden binâ etmişidim. Hâlâ kıbel-i şer‘den üzerine varılıp menzil-i merkūmda ihdâs ettiğim ebniyesinin ne mikdâr akçeye tahammülü vardır keşf ve tahrîr olunması matlûbumdur dedikde savb-ı şer‘den Mevlânâ Hasan Efendi b. Osman ve Hâssa mi‘mârlardan Üstâd Ali b. Halil irsâl olunup zeyl-i kitâbda mastûretü’l-esâmî olan Müslimîn mahall-i mezbûra varılıp vâki‘ hâl mütevellî-i merkūm Veli Bey mahzarında keşf ve müşâhede olundukda fi’l-hakīka müşârun-ileyh Hızır Ağa menzil-i merkūmu kendi mâlıyla müceddeden binâ etmiş bulunmağın mecmû‘una sarf olunan kereste-i mütenevvi‘anın ve mismârın ve taş ve kireç ve sâirin neccâriyye ve ırgadiyye ve hammâliyesiyle cem‘an ba‘de külli’l-hesâb yüz on dört bin akçeye tahammülü vardır deyu mi‘mâr-ı mezbûr ve sâir ehl-i vukūf-ı Müslimîn tahmîn-i sahîh ile tahmîn edip ittifâk ettiklerini mevlânâ-yı mezbûr mahallinde tahrîr edip ba‘dehû meclis-i şer‘a gelip inhâ ve haber vermeğin ber-vefk-i muharrer ebniye-i merkūme mütevellî-i merkūm ma‘rifeti ile müste’cir-i müşârun-ileyhin mu‘accelesine mahsûb olmak üzere bi’t-taleb sebt olundu. Hurrire fî-evâili şehri Zilka‘deti’ş-şerîfe li-sene tis‘a ve ışrîn ve elf. Şühûdü’l-hâl: İbrahim Ağa b. Şîrmerd, Ali Subaşı b. Abdullah, el-Hâc Keyvan b. Abdullah, Habib b. Mustafa, Ca‘fer b. Abdullah.