Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 312 Hüküm no: 263 Orijinal metin no: [82a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Veli Bey b. Abdülmennan’ın Tahtaminare mahallesinde bulunan vakıf evi kiralayıp tamir ettirdikten sonra vefat etmesi üzerine ne kadar masraf yaptığının tespiti Mahmiye-i İstanbul’da Tahtaminâre mahallesinde sâkin iken bundan akdem vefât eden Mahenver Hatun bt. Abdullah’ın zevc-i metrûkü ve sadriye sagīre kızı ( )’ın vasiyy-i şer‘îsi bâ‘isü’l-kitâb fahrü’l-a‘yân Ali Ağa b. ( ) meclis-i şer‘-i hatîr-i lâzımü’t-tevkīrde mahmiye-i merkūmede bi’l-fi‘il Haremeyn-i Muhteremeyn Vakfı’na mütevellî olan fahrü’l-akrân Veli Bey b.Abdülmennan nâm bevvâb-ı sultânî mahzarında vesâyeten takrîr-i merâm edip vakf-ı mezbûrdan mahalle-i mezbûrede vâki‘ lede’l-cîrân ma‘lûmü’l-hudûd olan menzili mütevellî-i mezbûr Veli Bey yevmî dört akçe icâre-i müeccele ve on bin akçe icâre-i mu‘accele ve lâzım gelen imâret ve meremmetine ve müceddeden kendi binâsına kendi mâlından izn-i şer‘le harc u sarf edeceği akçesi cânib-i vakf-ı mezbûrdan icâre-i mu‘accelesine mahsûb olmak üzere bundan esbak zevcem müteveffât-ı mezbûre Mahenver Hatun’a îcâr ve teslîm edip merkūme dahi minvâl-i muharrer üzere istîcâr ve kabûl ettikden sonra icâre-i mu‘accele-i mezbûresin vakıf için mütevellî-i merkūma teslîm ve ma‘rifet-i mütevellî ve izn-i şer‘le kendi mâlından ber-vech-i muharrer mu‘accelesine mahsûb bazı mevâzi‘ini müceddeden ve bazı mevâzi‘ini câ be-câ imâret ve meremmet etmişidi. Lâkin harc u sarf ettiği akçesi keşf ve tahrîr olunmadın fevt oldukda menzil-i mezbûr sagīre-i mezbûreye intikāl etmeğin vâki‘ hâli beyân için hâlâ kıbel-i şer‘den üzerine varılıp mecmû‘-ı binâ ve imâret ve meremmetinin ne mikdâr akçeye tahammülü vardır keşf ve tahrîr olunmak matlûbumdur dedikde savb-ı şer‘den Mevlânâ Hasan Efendi el-müderris ve Hâssa mi‘mârlardan Üstâd Ali b. Halil irsâl olunup zeyl-i kitâbda mastûretü’l-esâmî olan Müslimîn ile mahall-i mezbûra varılıp vâki‘ hâl mütevellî-i merkūm Veli Bey mahzarında keşf ve müşâhede ve mi‘mâr-ı merkūm ebniye-i cedîd ve sâiri mesâha ettikde fi’l-hakīka zikr olunan menzilin dâhiliyyesi kapısı üzerinde sofanın tûlen dört ve arzen üç hesâb-ı şatrancî üzere on iki zirâ‘ tuğla döşemesi müceddeden binâ ve hâriciyyesinin havâlesini ref‘ için tûlen sekiz zirâ‘ ve arzen iki zirâ‘ hesâb-ı şatrancî üzere on altı zirâ‘ yer müceddeden kestane tahtasıyla perde tutulup ve hamâmının câmekanının tuğla döşemeleri ve kubbe camları ve kireç sıvaları ve dâhiliyyesinde bir odanın dahi camların câ be-câ ve orta kapının perdesi mücedded ve zukāk tarafında kadden dört ve arzen üç mesâha-i şatrancî üzere on iki zirâ‘ taş duvar müceddeden ve hâriciyye ner[dü]ba[n] başında olan kenîfin tûlen beş zirâ‘ ve arzen dört zirâ‘ hesâb-ı şatrancî üzere yirmi zirâ‘ tuğla döşemesi tecdîd ve sâir mevâzi‘-i müte‘addidesi câ be-câ [82b] imâret ve meremmet olunmuş bulunmağın mecmû‘una sarf olunan taş ve kireç ve horasaninin ve sâir kereste-i mütenevvi‘asının ve mismârın üstâdiyye ve ırgadiyye ve hammâliyesiyle cem‘an ba‘de külli’l-hesâb sekiz bin elli sekiz akçeye tahammülü vardır deyu mi‘mâr-ı mezbûr ve sâir ehl-i vukūf Müslimîn tahmîn-i sahîh ile tahmîn edip ittifâk ettiklerini mevlânâ-yı mezbûr mahallinde tahrîr edip ba‘dehû meclis-i şer‘a gelip takrîr etmeğin mâ-hüve’l-vâkı‘ bi’t-taleb ketb olundu. Tahrîren fî-evâili Muharremi’l-harâm li-sene selâsîn ve elf. Şühûdü’l-hâl: Fahrü’l-akrân Süleyman b. Abdullah ez-zevvâk, Mehmed Ağa b. Davud, Ahmed Çelebi b. Emrullah, Rıdvan b. Abdullah, Yusuf b. Abdullah.