Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 312 Hüküm no: 262 Orijinal metin no: [82a-2, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Ağa b. Abdülmennan’ın Haremeyn-i Şerifeyn Vakfı’ndan bey‘ bi’l-istiğlâl yoluyla ödünç aldığı Medîne-i mahmiye-i Kostantıniyye mahallâtından Cezerî Kasımpaşa mahallesinde sâkin olan kıdvetü’l-emâcid ve’l-a‘yân İbrahim Ağa b. Abdülmennan el-müteferrika meclis-i şer‘-i şerîfe gelip işbu akdin kendisinden sudûruna kadar mâliki olduğu ve taht-ı tasarrufunda bulundurduğu, mahalle-i mezbûrede kâin, hudûdu bir tarafından merhûm Kaysûnî-zâde vakfı, bir tarafından Nefîse Hatun vakfı, bir tarafından Ferruh Kethüdâ vakfı, bir tarafından tarîk-ı âm ile mahdûd olan cemî‘ menzilini cümle tevâbi‘i ve levâhıkıyla râyicü’l-vakt otuz beş bin akçe-i Osmanî semen-i mu‘ayyen-i makbûzla Haremeyn-i şerîfeyn vakf-ı nükūduna hâlâ mütevellî olan fahrü’l-emsâl Ahmed Çelebi b. Kemal’e bey‘ ettiğini ikrâr ve i‘tirâf eyledi. O dahî vakıf malıyla ve istiğlâl maksadıyla menzil-i mezbûru iştirâ eyledi. Mütevellî-i mezkûr menzil-i mesfûru zeyildeki tarihden bir sene tamâmına beş bin iki yüz akçeye bâyi‘-i mezbûra icâreye verdi. Vâki‘ ikrâr mütevellî-i mezbûr tarafından vicâhen ve şifâhen tasdîk edildi. Menzil-i mezbûrun derkine ve ücret-i kirâya mahalle-i mezbûrede sâkin olan Yusuf Efendi b. Veli îcâb ve kabûlü hâvî kefâletle kefîl oldu. Cerâ zâlike ve hurrire fî-gurreti şehri Rebî‘i’l-âhir min-şühûri sene selâsîn ve elf. Şühûdü’l-hâl: Ali Bey b. Abdullah el-cündî el-câbî, Ali Çelebi b. Mehmed cündî, Yusuf Bey b. el-cündî, Mehmed b. Süleyman, Mustafa b. el-müderris ve gayrühüm