Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 316 Hüküm no: 267 Orijinal metin no: [83a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haremeyn Vakfı’ndan Emin Sinan mahallesinde olan vakıf evin kiracısı İbrahim Çelebi b. Mehmed tarafından tamir için yapılan masrafın tespiti Haremeyn-i Muhteremeyn Evkāfı’ndan mahmiye-i İstanbul’da Emin Sinan mahallesinde vâki‘ lede’l-ahâlî ve’l-cîrân ma‘lûmü’l-hudûd ve’l-hîtân olan yevmî bir akçe icâre-i müeccele ve on bir bin beş yüz akçe icâre-i mu‘accele ile müste’ciri olan bâ‘isü hâze’l-kitâb fahrü’l-emâsil İbrahim Çelebi b. Mehmed nâm kimesne meclis-i şer‘-i hatîr-i lâzımü’t-tevkīrde bi’l-fi‘il vakf-ı mezbûr mütevellîsi Veli Bey mahzarında takrîr-i merâm edip bundan esbak mütevellî ma‘rifetiyle mu‘acceleme mahsûben menzil-i merkūmun bazı mevâzi‘i müceddeden binâ ve bazı mevâzi‘i meremmet ve imâret etmişidim. Hâlâ kıbel-i şer‘den üzerine varılıp vâki‘ hâl keşf ve müşâhede olunmak matlûbumdur dedikde savb-ı şer‘den Mevlânâ Mustafa Efendi ve Hâssa mi‘mârlardan Üstâd Ali b. Halil irsâl olunup zeyl-i kitâbda mastûretü’l-esâmî olan Müslimîn ile mahall-i mezbûra varılıp vâki‘ hâl keşf ve müşâhede olundukda fi’l-hakīka menzil-i merkūmun mevâzi‘-i müte‘addidesi câ be-câ tecdîd ve imâret ve câ be-câ meremmet olunmuş bulunmağın mecmû‘una sarf olunan kereste-i mütenevvi‘anın neccâriyye ve ırgadiyye ve hammâliyesiyle ve hâlen müceddeden binâsı lâzım gelen iki kıt‘a taş duvar ve pâyeleriyle cem‘an ba‘de külli’l-hesâb otuz dört bin beş yüz doksan altı akçeye tahammülü vardır deyu mi‘mâr-ı mezbûr ve sâir ehl-i vukūf Müslimîn tahmîn edip ittifâklarını mevlânâ-yı mezbûr mahallinde tahrîr ba‘dehû meclis-i şer‘a gelip haber vermeğin mâ-vaka‘a sebt olundu. Fî-evâsıtı Cumâdelûlâ li-sene selâsîn ve elf. Şühûdü’l-hâl: Ahmed Efendi b. ( ) el-imâm, Abdülhâlık b. Ahmed, el-Hâc Mehmed b. İlyas el-müezzin, Ahmed Çelebi b. Hasan el-kâtib, İslâm Bey b. Nuh, Mahmud Halîfe b. ( ) el-müezzin, Mehmed b. Süleyman ve gayruhüm.