Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 317 Hüküm no: 268 Orijinal metin no: [83b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Üsküdar Hamza Fakih mahallesinden Pervane b. Abdullah’ın mülkünü vakfiyesi Hasbiyallah Elhamdülillâhi Rabbü’l-erbâbi ve’s-salâtü ve’s-selâmü alâ-efdali men-ûtiye’l-hikmeti ve fasli’l-hitâb ammâ ba‘de bu vakfiyye-i sahîha-i şer‘iyyenin sâhibi ve hayrât ve hasenâtın râgıbı Pervâne b. Abdullah nâm kimesne vaktâ ki hazret-i izzet cânibinden vâsıl olan atâyâ-yı celiyyeyi tefekkür edip ve sebeb-i ecr-i cezîl olacak nesne savbına inân-ı azîmet edip mahrûse-i Üsküdar mahallâtından Hamza Fakih mahallesinde vâki‘ tarafeyn-i Mahmud Efendi mülküne ve bir tarafı Safiye Hatun mülküne ve bir tarafı tarîk-î hâssa müntehî olan bir bâb fevkānî ve bir bâb tahtânî evleri ve muhavvatayı ve kenîfi müştemil mülk menzilini vakf-ı sahîh-i şer‘î ve habs-i sarîh-i mer‘î edip süknâsını evvelâ nefsine ba‘de vefâtihî zevcesi Kamile bt. Abdullah nâm hatuna ba‘de vefâtihâ evlâdına ve evlâd-ı evlâdına ile’l-inkırâz ve ba‘de’l-inkırâz menzil-i merkūm ecr-i misli îcâr olunup hâsıl olan <> ücreti Medîne-i Münevvere fukarâsına irsâl oluna deyu şart ve ta‘yîn edip menzil-i mezbûru li-ecli’t-tescîl mütevellî nasb ve ta‘yîn ettiği Mehmed b. Nuh nâm kimesneye teslîm ol dahi kabz ve tesellüm eyleyip emr-i vakf tamâm oldukdan sonra vâkıf-ı mezbûr vakf-ı mesfûrdan rücû‘ edip İmâm-ı Azam ve hümâm-ı efham Hazret-i Ebî Hanife katında lüz[û]m mu‘teber midir deyu da‘vâ ve kemâ-kân mülküne idhâli murâd eyledikde mütevellî-i mezbûr dahi redden imtinâ‘ edip İmâm-ı Ebî Yusuf ve İmâm-ı Muhammed katlarında lüzûm-ı vakf mütelâzımândır deyu muhâsama edip muvakkı‘-ı sadr-ı kitâb olan hâkim murâfa‘a olup hükm-i şer‘î taleb ettikde hâkim-i mûmâ-ileyh sıhhat ve lüzûmuna hükmedip “Fe-men beddelehû ba‘de mâ-semi‘ahu fe-innemâ ismühû ale’llezîne yübeddilûnehû innellâhe semî‘un alîm” ve ecrü’l-vâkıf ale’l-hayyi’l-kerîm. Tahrîren fî-evâili Cumâdelâhire min-şühûri sene selâsîn ve elf. Şühûdü’l-hâl: Mehmed Efendi b. ( ) el-imâm, Ahmed Bey b. Kasım el-cündî, Muslu Çelebi b. Kasım, Mehmed Çelebi b. ( ), Nurullah Çelebi b. ( ), Ahmed Çelebi b. ( ), Hüseyin Çelebi b. ( ), Mahmud b. Ahmed, Nurullah ve gayruhüm mine’l-hâzırîn.