Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 334 Hüküm no: 288 Orijinal metin no: [88a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bekir Ağa’nın İstanbul’da Hoca Rüstem mahallesinde kiracısı olduğu vakıf evin tamiri için ne kadar masraf yaptığının tespiti talebi Haremeyn-i Şerîfeyn Vakfı’ndan mahmiye-i İstanbul’da Hoca Rüstem mahallesinde vâki‘ lede’l-cîrân ma‘lûmü’l-hudûd olup tûlen yirmi ve arzen on dört be-hesâb-ı şatrancî iki yüz seksen zirâ‘ arsa üzere mebnî fevkānî ve tahtânî büyût-ı müte‘addideyi ve iki sofayı ve ahırı ve kenîfi müştemil menzilin icâre-i mu‘accele ve yevmî on beş akçe icâre-i müeccele ile hâlâ müste’ciri olan bâ‘isü’l-kitâb Bekir Ağa b. ( ) <> meclis-i şer‘de vakf-ı mezbûra bi’l-fi‘il mütevellî olan fahrü’l-akrân Veli Bey b. Abdullah mahzarında takrîr-i kelâm ve ta‘bîr ani’l-merâm edip bundan [akdem] menzil-i mezbûr bi’l-külliye harâba müşrif olup imârete muhtâc oldukda kendi mâlımla imâret ve meremmet <> etmişidim. Hâlâ kıbel-i şer‘den üzerine varılıp ne mikdâr akçeye tahammülü vardır tahrîr olunması matlûbumdur dedikde savb-ı [şer‘den] Hüseyin Efendi ve Hâssa mi‘mârlardan Üstâd Ali b. Halil irsâl olunup zeyl-i kitâbda mastûretü’l-esâmî olan Müslimîn ile mahall-i mezbûra varılıp vâki‘ hâl mütevellî-i merkūm mahzarında keşf ve müşâhede olundukda fi’l-hakīka zikr olunan menzil ber-vech-i muharrer müceddeden imâret olunmuş bulunup bu cümleye sarf olunan kereste-i mütenevvi‘asının üstâdiyye ve ırgadiyye ve hammmâliyeleriyle cem‘an ba‘de külli’l-hesâb yüz seksen bin iki yüz on beş akçeye tahammülü vardır dedikde mâ-vaka‘a isre’t-taleb ketb olundu. Fî-evâhiri Cumâdelâhire li-sene ihdâ ve selâsîn ve elf. Şühûdü’l-hâl: İshak Efendi el-Müderris, Kasım Bey b. ( ), Ömer Çelebi, İsmail b. ( ), Mustafa b. ( ).