Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 333 Hüküm no: 287 Orijinal metin no: [88a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rıdvan Ağa b. İskender’in İstanbul Cezeri Kasımpaşa mahallesinde kiracısı olduğu vakıf evin tamiri için ne kadar masraf yaptığının tespiti talebi Haremeyn-i Şerîfeyn Vakfı’ndan mahmiye-i İstanbul’da Cezerî Kasım Paşa mahallesinde vâki‘ lede’l-cîrân ma‘lûmü’l-hudûd olup dâhiliyye ve hâriciyyesi fevkānî ve tahtânî büyût-ı müte‘addideyi müştemil menzilin icâre-i müeccele ve yevmî kırk akçe icâre-i müeccele ile hâlâ müste’ciri olan bâ‘isü’l-kitâb Rıdvan Ağa b. İskender nâm müteferrika meclis-i şer‘-i hatîr-i lâzımü’t-tevkīrde vakf-ı mezbûra bi’l-fi‘il mütevellî olan fahrü’l-akrân Veli Bey b. Abdülmennan nâm bevvâb-ı sultânî mahzarında takrîr-i kelâm edip bundan akdem menzil-i mezbûrun dâhiliyye ve hâriciyyesinde hesâb-ı şatrancî üzere beş yüz yedi zirâ‘ taş duvarı ve altı yüz altı zirâ‘ dolma duvarı ve yüz elli zirâ‘ tahta döşemesi ve yetmiş zirâ‘ tavanı ve üç yüz altmış sekiz zirâ‘ kaldırımı ve yetmiş yedi zirâ‘ trabzanı ve iki bâb fırını ve bir musluk ve teknesi ve iki aded demir <> kapısı ve dört aded demir kapakları ve hamâmı ve kurşun boruları ve câmekân ve külhanı ve kazganı ve sakfının kurşunu ve câmı câ be-câ bazı mevâzi‘i harâba müşrif olup imârete muhtâc oldukda kendi mâlımla imâret edip ba‘dehû kıymeti icâre-i mu‘acceleme mahsûb olmak üzere izn-i şer‘ ve ma‘rifet-i mütevellî ile imâret etmişidim. Hâlâ kıbel-i şer‘den üzerine varılıp vâki‘ hâl keşf ve ne mikdâr akçeye tahammülü vardır tahrîr olunması matlûbumdur dedikde savb-ı şer‘den << bu fakīr ve hâssa mi‘mârlardan Üstâd Ali b. Halil zeyl-i kitâbda esâmîleri mastûr olan bî-garaz Müslimîn ile mahalli mezbûra varılıp vâki‘ hâl mütevellî-i merkūm mahzarında keşf olundukda fi’l-hakīka menzil-i mezbûrun mevâzi‘-i merkūmeleri ber-vech-i muharrer imâret olunmuş bulunup bu cümleye sarf olunan kereste-i mütenevvi‘asının üstâdiyye ve ırgadiyye ve hammâliyeleriyle cem‘an ba‘de külli’l-hesâb yüz kırk bin iki yüz on iki akçeye tahammülü vardır noksân ile olmaz deyu mi‘mâr-ı mezbûr ve sâir ehl-i vukūf ittifâk etmeğin mâ-vaka‘a isre’t-taleb ketb olundu. Fî-evâhiri Cumâdelâhire li-sene ihdâ ve selâsîn ve elf. Şühûdü’l-hâl: Ya‘kub Ağa b. ( ), el-müteferrika, Mehmed Ağa b. ( ) ez-zevvâk, Hasan Bey b. Ali el-bevvâb, İsmail Bey b. Mahmud el-bevvâb, Mehmed Bey b. Gazanfer el-bevvâb, Mustafa Bey b. ( ) el-bevvâb.