Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 337 Hüküm no: 292 Orijinal metin no: [89a-1, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haremeyn Vakfı’nın ev satın alması Medîne-i mahmiye-i Kostantıniyye’de Tahtakale diye ma‘rûf mevzi‘ kurbünde vâki‘ Burgaz Halil Paşa mahallesinde sâkin Yahya Çavuş b. Mehmed nâm kimse meclis-i şer‘-i şerîfe hâzır olup işbu akdin kendisinden sudûruna kadar mâliki olduğu ve taht-ı tasarrufunda bulundurduğu, mahalle-i mezbûrede kâin, yirmi dört bâb fevkānî ve tahtânî hâneyi, kileri, kenîfi ve su kuyusunu müştemil, hudûdu bir tarafından Menahem v. Avraham mülkü, bir tarafından merhûm Mehmed Ağa vakfı, tarafeynden de tarîk-ı âm ile mahdûd bulunan cemî‘ menzili râyicü’l-vakt üç yüz yetmiş bin akçe semen-i mu‘ayyen-i makbûzla, Haremeyn-i Şerîfeyn Evkāfı nâzırı olan Dârüssa‘âde ağalığı hizmetiyle müşerref iftihârü’l-havâs ve’l-mukarrebîn el-mahfûf bi-sunûfi avâtifi’l-meliki’l-mu‘în İsmail Ağa b. Abdülmuin cânibinden iştirâ ve tasdîka vekâleti bi-mâ hüve tarîku’s-sübût şer‘an sâbit olan, mahmiye-i mezkûrede vâki‘ Haremeyn-i Şerîfeyn Evkāfı muhâsibi hâfız-ı hâze’l-kitâb Ahmed Efendi b. Mehmed’e bey‘ eylediğini ikrâr etti. O dahi vekâlet-i hasebiyle ve Dârü’l-aliyye-i şerîfe ağalarından merhûm Abbas Ağa vakfı mâlıyla, vâkıf-ı mezbûrun vakfiyesinde mevcûd, mu‘teber bir mahalde, istiğlâl ve istismâra sâlih bir akār iştirâ edilmesi ve icâre-i mu‘tâde ile icâreye verilip hâsıl olan ücret-i kirânın Medîne-i münevvere fukarâsına irsâli şartı mûcibince menzil-i mezbûru iştirâ eyledi. Vâki‘ ikrâr vekîl-i mezbûr tarafından bi’l-müvâcehe tasdîk edildi. İşbu mubâya‘a, hâkim-i hâsim-i muvakkı‘ a‘lâhu el-mutevakkı‘ rızâi rabbihî mevlâhu indinde akd-i mezkûrun vakfa nâfi‘ olduğu zâhir ve sâbit olmasından sonra vukû‘ buldu. Cerâ zâlike ve hurrire fî-evâsıtı Recebi’l-esam li-sene ihdâ ve selâsîn ve elf. Şühûdü’l-hâl: es-Sâbikūn