Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 337 Hüküm no: 293 Orijinal metin no: [89a-2, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haremeyn Vakfı’nın ev satın alması Elhamdülillâhi’llezî ehalle’l-bey‘a ve harreme’r-ribâ ve’s-salâtü ve’s-selâmü alâ-resûlihî Muhammedin el-Mustafa ve alâ-âlihî ve ashâbihi’llezîne hüm nücûmü’l-hedyi ve ba‘d, işbu mazmûnunda vakıf ikrârından bahseden sahîh ve şer‘îh bir hüccettir. Mahmiye-i Kostantıniyye mahallâtından Sarı Mehmed Paşa mahallesi sükkânından İliya v. Yahuda ve Yahuda v. Menahem nâm Yahudiyân meclis-i şer‘-i şerîfe -sânehu’llâhü te‘âlâ ani’t-tağyîr ve’t-tahrîf- hâzırân olup şöyle ikrâr ve i‘tirâf ettiler ki, işbu akdin kendisinden sudûruna kadar mâliki olduğu ve taht-ı tasarrufunda bulundurduğu, mahalle-i mezbûrede kâin, yirmi dört bâb fevkānî ve tahtânî hâneyi, kileri, kenîfi ve su kuyusunu müştemil, hudûdu bir tarafından Kethüdâ ( ) Hatun mülkü, bir tarafından Sahi bt. Mordehay mülkü, bir tarafından tarîk-ı hâs, bir tarafından tarîk-ı âm ile mahdûd bulunan cemî‘ menzili cümle tevâbi‘i ve levâhıkıyla râyicü’l-vakt üç yüz on bin akçe semen-i mu‘ayyen-i makbûzla, Haremeyn-i Şerîfeyn Evkāfı nâzırı olan Dârüssa‘âde ağalığı hizmetiyle müşerref iftihârü’l-havâs ve’l-mukarrebîn el-mahfûf bi-sunûfi avâtifi’l-meliki’l-mu‘în İsmail Ağa b. Abdülmuin cânibinden iştirâ ve tasdîka vekâleti bi-mâ hüve tarîku’s-sübût şer‘an sâbit olan, mahmiye-i mezkûrede vâki‘ Haremeyn-i Şerîfeyn Evkāfı muhâsibi hâfız-ı hâze’l-kitâb Ahmed Efendi b. Mehmed’e bey‘ eylediler. O dahi vekâlet-i hasebiyle ve Dârü’l-aliyye-i şerîfe ağalarından merhûm Abbas Ağa vakfı mâlıyla, vâkıf-ı mezbûrun vakfiyesinde mevcûd, mu‘teber bir mahalde, istiğlâl ve istismâra sâlih bir akār iştirâ edilmesi ve icâre-i mu‘tâde ile icâreye verilip hâsıl olan ücret-i kirânın Medîne-i münevvere fukarâsına irsâli şartı mûcibince menzil-i mezbûru iştirâ eyledi. Vâki‘ ikrâr vekîl-i mezbûr tarafından bi’l-müvâcehe tasdîk edildi. İşbu mubâya‘a, hâkim-i hâsim-i muvakkı‘ a‘lâhu el-mutevakkı‘ rızâi rabbihî mevlâhu indinde akd-i mezkûrun vakfa nâfi‘ olduğu zâhir ve sâbit olmasından sonra vukû‘ buldu. Sonra mahalle-i mezbûre sükkânından Menahem v. Hatuka ve Yasef v. Mosi nâm Yahudiyân menzil-i mezbûrun derkine îcâb ve kabûlü hâviye kefâletle kefîl oldu. Cerâ zâlike ve hurrire fî-evâsıtı Recebi’l-mürecceb li-sene ihdâ ve selâsîn ve elf. Şühûdü’l-hâl: es-Sâbikūn