Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 369 Hüküm no: 318 Orijinal metin no: [100b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kostantin v. Manol’un Darüssaade ağaları para vakfına olan borcunu tamamen ödediği Dârü’s-saltanati’s-seniyye Kostantıniyyetü’l-mahmiye’de vâki‘ Haremeyn-i Şerîfeyn Evkāfı’ndan vakf-ı ağayân-ı Dârüssaâde demekle ma‘rûf nükūd akçe üzerine hâlâ mütevellî olan fahrü’l-akrân Mustafa Bey b. Kurd nâm bevvâb-ı sultânî meclis-i şer‘de mahmiye-i mezbûrede Tahtaminâre mahallesinde sâkin hâmilü’l-kitâb Kostantin v. Manol nâm Nasrâni mahzarında ikrâr u i‘tirâf edip vakf-ı mezbûr mâlından merkūm Kostantin zimmetinde olan yüz yirmi bin akçeden sâbıkā elli bin akçe bâkī kalmış idi. Hâlâ meblağ-ı mezbûr elli bin akçeyi dahi merkūm Kostantin yedinden vakıf için tamâmen ahz u kabz ettim. Min-ba‘d meblağ-ı mezbûrdan zimmetinde bir akçe ve bir habbe bâkī kalmadı dedikde mütevellî-i mezbûrun cârî olan ikrârını merkūm Kostantin dahi vicâhen ve şifâhen tasdîk edip vâki‘ hâl mezbûrânın talebiyle ketb olundu. Tahrîren fî-evâsıtı şehri Rebî‘i’l-âhir min-şühûri sene isneyn ve selâsîn ve elf. Şühûdü’l-hâl: Fazlullah Çelebi b. Ca‘fer el-müderris, Halil Efendi b. el-Hâc Mahmud, Fethullah b. Ali, Yusuf b. Abdullah.