|
Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 94 Hüküm no: 7 Orijinal metin no: [2a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Polihroni Hanı’nda kölesi tarafından öldürülen Hacı Ali’nin nasıl öldüğünün keşfedilmesi
Fi’l-asl Medîne-i Haleb’de Mankosa mahallesi ahâlîsinden olup hâlâ mahmiye-i İstanbul’da Katır hanı’nda sâkin işbu râfi‘ü’l-kitâb el-Hâc Halil b. Hacı Ahmed nâm kimesne meclis-i şer‘-i hatîr-i lâzımü’t-tevkīrde takrîr-i kelâm edip mahmiye-i mezbûrede Küçük Karaman’da vâki‘ Polihroni hanı demekle ma‘rûf handa sâkin olan karındaşım Hacı Ali nâm kimesneyi târih-i kitâb gecesi nısfü’l-leylde mukaddem sâkin olduğu oda içinde kendi gulâmı gāib ani’l-meclis Gürciyyü’l-asl Şahin boğazının sol taraf[ın]dan kürde ta‘bîr olunur kılıç ile zebh edip ol sâ‘at vefât etmişdir hâlâ maktûl-i mezbûrun üzerine varılıp eser-i cerâhati keşf ve tahrîr olunması matlûbumdur dedikde, kıbel-i şer‘den mevlânâ Ali Efendi b. Davud irsâl olunup ol dahi zeyl-i rakīmde isimleri mastûr olan müslimîn ile mârrü’z-zikr hana varıp hâlâ za‘îmü’l-vakt olan Hüseyin Ağa b. Sefer ile asesbaşı olan Ahmed Ağa b. Mehmed muvâcehesinde maktûl-i mezbûrun a‘zâsına nazara eylediklerinde fi’l-vâki‘ maktûl-i mezbûr vech-i muharrer üzre boğazının sol tarafından kürde ta‘bîr olunur kılıç ile zebh olunup ol sâ‘at maktûlen vefât eylediğini mevlânâ-yı mezbûr mahallinde tahrîr ba‘dehû ma‘an irsâl olunan Hüseyin Çelebi b. Ebûbekir ile meclis-i şer‘a gelip alâ vukū‘ihî inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’l-hâmis aşer min şehri Rebî‘ilevvel li sene seb‘a ve seb‘în ve elf.
Şuhûdü’l-hâl: Es-Seyyid Mehmed Efendi b. Seyyid İbrahim, es-Seyyid Mehmed Çelebi b. es-Seyyid Ahmed, Ali Ağa b. Abdülkerim, Hüseyin Çelebi b. Mustafa, Mehmed Beşe b. Ali, es-Seyyid İbrahim Çelebi çavuş-ı nakībü’l-eşrâf, es-Seyyid Osman Çelebi b. Abdurrahman, Ahmed Beşe b. İbrahim, Mehmed Beşe b. Mustafa, Ahmed Beşe b. Mehmed.
|