Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 371 Hüküm no: 320 Orijinal metin no: [101b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. [Mükerrer Kayıt] Emine bt. Pir İlyas’ın evininin varislerine ait olduğu ve Haremeyn Evkafı mütevellisinin müdahalesinin engellenmesi Husûs-ı âti’l-beyânı mahallinde vukū‘u üzere tahrîr için adam taleb olundukda savb-ı şer‘den Mevlânâ Abdurrahman irsâl olunup ol dahi zeyl-i kitâbda isimleri mastûr olan Müslimîn ile menzil-i âti’z-zikre varıp akd-i meclis ettiklerinde mahrûse-i İstanbul’da Haremeyn-i Şerîfeyn Evkāfı’na bi’l-fi‘il mütevellî olan fahrü’l-emâsil ve’l-a‘yân Hüseyin Bey b. Mekkî [Memi] mahrûse-i mezbûrede mahallâtından Arabacı Bayezid mahallesinde sâkine iken müteveffât olan Emine bt. İlyas nâm hatunun li-ebin karındaşı kızları ve ale’l-vechi’l-inhisâr vâriseleri olup menzil-i âti’z-zikre vâzı‘ateynü’l-yed oldukları nehc-i şer‘î üzere sâbite olan Âişe Hatun ve Meliki Hatun ibnetey Hasan mahzarlarında üzerlerine takrîr-i da‘vâ edip mahalle-i mezbûrede vâki‘ bir cânibi Hasan Çelebi b. Ahmed mülkü ile ve bir cânibi Abdülaziz el-müezzin mülkü ile ve iki cânibi tarîk-i âm ile mahdûd olup dâhiliyye ve hâriciyyesi büyût-ı müte‘addideye ve zâtü’l-eşcâr-ı müsmire ve gayr-i müsmire muhavvatayı müştemil olan menzilini mülkünde olduğu hâlde Haremeyn-i Şerîfeyn fukarâsına vakfedip lâkin kable’t-teslîmi ile’l-mütevellî ve’t-tescîli’ş-şer‘î müteveffât olmuşdur. Hâlâ menzil-i mezbûr vech-i muharrer üzere fukarâ-i mezkûrîne vakfolmuş iken mezbûretân Âişe Hatun ve Meliki Hatun üzerine bi-gayrı hakkın vaz‘-ı yed ve tasarruf ederler yed-i âdiyelerin kasr ve izâleden sonra cânib-i vakf-ı mezbûra teslîm ettirilmek matlûbumdur dedikde gıbbe’s-suâl merkūmetân takrîr-i makāl edip menzil-i mezbûr müteveffât-ı mezbûreden bize intikāl etmiş mülk-i mevrûslarımızdır müteveffât-ı mezbûre vech-i muharrer üzere vakfettiği ma‘lûmum değildir deyu inkârile cevâb verdiklerinde mevlânâ-yı merkūm vech-i meşrûh üzere mahallinde tahrîr edip ba‘dehû gelip ihbâr ettikden sonra tekrâr tekrâr meclis-i şer‘de mezbûretân Âişe Hatun ve Meliki Hatun mütevellî-i merkūmdan da‘vâsını mübeyyine beyyine taleb ettiklerinde ikāmet-i beyyine için istimhâl edip mehl-i şer‘î verilip imhâl-i mezbûr müddeti münkaziye olup ikāmet-i beyyineden âciz olmağla istihlâf edicek mezbûretân Âişe Hatun ve Meliki Hatun mûriseleri olan müteveffât-ı mezbûre menzil-i merkūmu vech-i muharrer üzere vakfettiği ma‘lûmları olmadığına gıbbe’t-tahlîf mahzar-ı hasm-ı mezbûrda yemîn billâh ettiklerinden sonra mezbûretân dahi fakīreler olup ve mütevellî-i mezbûr da‘vâsında teslîm-i mütevellî ve tescîl-i şer‘î olmadığın tasrîh etmeğin mütevellî-i merkūm da‘vâdan men‘ ve menzil-i mezbûr merkūmetânın yedlerinde hâlâ ibkā olunup bi’t-taleb ketb olundu. Tahrîren fî-evâili şehri Saferi’l-hayr li-sene isneyn ve selâsîn ve elf. Şühûdü’l-hâl: Fahrü’l-emâsil Bekir Ağa b. Ali, Fahrü’l-akrân Yusuf Bey b. Abdullah, Ömer Bey b. Abdullah, Osman Bey b. ( ) el-bevvâbü’s-sultânî, Mahmud Çelebi b. ( ) el-yesârî.