Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 372 Hüküm no: 321 Orijinal metin no: [101b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şems Hatun bt. Abdullah’ın tasarrufunda olan evin tamirine ne kadar masraf yaptığının tespiti Budur ki; mahrûse-i İstanbul’da vâki‘ el-Hâc Hasan mahallesinde sâkine Şemsimâh bt. Abdullah meclis-i şer‘de takrîr-i kelâm edip Haremeyn-i Şerîfeyn Evkāfı’ndan mahalle-i mezbûrede vâki‘ bir tarafı Hüsrev kethüdâ vakfına ve bir tarafı Ca‘fer b. Abdülmennan mülküne ve bir tarafı Pervîz b. Abdullah mülküne ve bir tarafı tarîk-i âmma müntehî olup icâre-i mu‘accele ve müeccele ile mutasarrıfe olduğum menzilin bazı mevâzi‘i harâba müşrif tecdîd ve ta‘mîre muhtâc oldukda bundan akdem ma‘rifet-i mütevellî ve izn-i şer‘le kendi mâlım ile harcım mu‘accelesine mahsûb [olmük] üzere tecdîd ve ta‘mîr edip on üç bin sekiz yüz akçe harc u sarf etmiş idim hâlâ cânib-i şer‘den üzerine varılıp tecdîd ve ta‘mîr olunan mevâzi‘ harc-ı mezbûra mütehammil midir keşf ve müşâhede olunmasını taleb ederim dedikde cânib-i şer‘den Mevlânâ Fazlullah ve Mi‘mâr-ı hâssa Üstâd Ali b. Halil irsâl olunup onlar dahi zeyl-i kitâbda mastûretü’l-esâmî olan ehl-i vukūf ile mahall-i mezbûra varılıp vakf-ı mezbûr mütevellîsi Hüseyin Ağa b. Memi mahzarında keşf ve müşâhede ettiklerinde menzil-i mezbûrun [102a] hâriciyyesinde tûlen yedi zirâ‘ ve kadden dört zirâ‘ be-hesâb-ı şatrancî yirmi sekiz zirâ‘ taş duvarlı ve tûlen on dört zirâ‘ ve arzen yedi zirâ‘ be-hesâb-ı şatrancî yetmiş zirâ‘ sakflı bir ahır ve oda sofasına muttasıl bir şâhnişîn ve zikr olunan sofanın tahta döşemesi ve tûlen on zirâ‘ ve kadden dört zirâ‘ dolma duvarı ve bir nerdübânı ve sofa altında be-hesâb-ı şatrancî sekiz zirâ‘ taş duvar ve taş kuyu ağızlığı ve dâhiliyyesinde yedi kulaç bi’r-i mâyı müceddeden ve bazı mevâzi‘i ta‘mîr olunmuş bulunup bu mezkûrâtın ve direği ve merteği ve pedavrası ve kiremidi ve iki pencere demirleri ve dört camları ve tavanı ve kuyu taşları ve mismârı ve sâir kerestesi ve üstâdiyye ve neccâriyye ve hammâliye ve ırgadiyesi on üç bin sekiz yüz akçe ile ancak olur noksân ile olmam mümkün değildir mimâr-ı mezbûr ve sâir ehl-i vukūf ittifâk ettiklerinde vech-i meşrûh üzere ittifâklarını mevlânâ-yı mezbûr mahallinde tahrîr ve gelip meclis-i şer‘de ihbâr etmeğin mâ-vaka‘a bi’t-taleb ketb olundu. Tahrîren fî-evâsıtı şehri Rebî‘i’l-âhire min-şühûri sene isneyn ve selâsîn ve elf. Şühûdü’l-hâl: Muharrem Efendi b. Abdürrezzak el-müderris, Abdülkerim Efendi b. Abdi el-müderris, Abdurrahman Efendi b. ( ) eş-şehîr bi-Kara Hoca, Mustafa Çelebi b. Mehmed el-bevvâbü’s-sultânî, Ali b. Hızır el-câbî, İsmail b. Mahmud bevvâbü’s-sultânî ve gayruhüm.