Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 406 Hüküm no: 348 Orijinal metin no: [114b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Medine Evkafı’ndan Camcı Ali mahallesinden Ömer Çavuş ve karısı Saime’nin kiracısı oldukları vakıf ev ve tamiri için mütevellisinden hüccet talebleri Sâhibü hâze’l-kitâb fahrü’l-akrân Ömer Çavuş b. Mustafa ve zevce-i mükerremeleri Sâime bt. Abdülmennan meclis-i şer‘-i şerîfe hâzırân olup takrîr-i kelâm kılıp Medîne-i Münevvere sallallâhu te‘âlâ alâ-münevvirihâ evkāf-ı şerîfelerinden Dârü’s-saltanati’s-seniyye Kostantıniyyetü’l-mahmiye mahallâtından Camcı Ali mahallesinde vâki‘ bir tarafı Mustafa Bey Vakfı bir tarafı Ferhad Bey Vakfı ve bir tarafı Kethüdâ ve bir tarafı Kethüdâ Canfeda Hatun Vakfı ve bir tarafı tarîk-i âm ile mahdûd olan menzili icâre-i mu‘accele ve beher yevm ikişer akçe ücret-i müeccele ile mutasarrıf olan Sefer b. Mustafa nâm kimesne menzil-i mezbûrun hakk-ı süknâsını hîn-i tefvîzde evkāf-ı mezbûre mütevellîsi olan Veli Bey nâm bevvâb-ı sultânî ma‘rifetiyle bize ferâğ ve tefvîz edip minvâl-i meşrûh üzere dahi tefevvüz ettiğimden sonra mütevellî-i mezbûr menzil-i mezbûru evkāf-ı mersûme defterine bizim üzerimize kayd edip hâlâ menzil-i mesfûrun ebniyesi harâba müşrif olup ücret-i müeccelesi olan iki akçenin biri ile meremmet lâzım gelmeğin meblağ-ı merkūm iki akçenin bir akçesi binâ ve meremmetine sarf edip ve beher yevm bir akçesini cânib-i vakf-ı mezbûra vermek üzere bi’l-fi‘il evkāf-ı mezbûre mütevellîsi olan ebnâ-i sipâhiyândan fahrü’l-akrân Hüseyin Bey b. Memi yedimize temessük vermişdir nazar olunup mûcebince kıbel-i şer‘-i şerîfden dahi istihkâmen elimize hüccet-i şer‘iyye verilmek matlûbumuzdur deyu mütevelliyân-ı mezbûrân Veli Bey ve Hüseyin Bey imzâları ile mümzâ ve hatemleriyle mahtûm temessükler ibrâz edip nazar olundukda min-külli’l-vücûh merkūmân Ömer Çavuş ve Sâime Hatun’un kelâmlarına mutâbık bulunmağın mûcebince savb-ı şer‘-i şerîfden işbu hurûf ber-sebîl-i temessük ketb ve imlâ olunup yed-i tâlibe def‘ olundu. Tahrîren fî-evâili şehri Ramazâni’l-mübârek li-sene isneyn ve selâsîn ve elf. Şühûdü’l-hâl: Mahmud Efendi b. Ömer el-Müderris, Halil Efendi b. Mahmud el-Müderris, Hasan Çelebi b. Hüseyin el-Mi‘mâr, Mustafa Çelebi b. Lutfullah el-Bevvâb.