Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 405 Hüküm no: 347 Orijinal metin no: [114a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Akseki mahallesinde Rabia Hatun Vakfı olan evi kiralayana Dergâh-ı âlî yeniçerileri çorbacılarından Mustafa b. Mehmed’in hüccet talebi Sâhibü hâze’l-kitâb Dergâh-ı âlî yeniçerileri şurbacılarından fahrü’l-emâsil ve’l-akrân Mustafa b. Mehmed meclis-i şer‘-i şerîfe hâzır olup takrîr-i kelâm kılıp merhûme Rabia Hatun evvelâ kendi nefsine ba‘dehâ Medîne-i Münevvere fukarâsına vakfettiği mahmiye-i Kostantıniyye mahallâtından Akseki mahallesinde vâki‘ inde’l-ahâlî ve’l-cîrân ma‘lûmü’l-hudûd olup beş bâb fevkānî ve tahtânî odaları ve ahırı ve bahçeyi ve kenîfi müştemil olan menzil fukarâ-i mezbûreye intikāl etmeğin bi’l-fi‘il Medîne-i Münevvere -sallallâhu te‘âlâ alâ-münevvirihâ- Evkāf-ı şerîfesine mütevellî olan ebnâ-i sipâhiyândan fahrü’l-emâsil ve’l-akrân Hüseyin Bey b. Memi icâre-i mu‘accele ve ücret-i müeccele ile tâlibîne arz edip nice müddet sûk-ı sultânîde nidâ ettirdikden sonra altmış bin akçe icâre-i mu‘accele ve beher yevm birer akçe ücret-i müeccele ile benim üzerimde karâr edip âhirü’l-emr kimesne ziyâdeye bir akçe ve bir habbe vermeyicek mütevellî-i mezbûr vakf-ı mezkûr için benden altmış bin akçe icâre-i mu‘accele ahz u kabz ettikden sonra menzil-i mezbûrun ba‘de’t-tahliyye târîh-i kitâb gününden beher yevm birer akçe ücret-i müeccele ile bana îcâr ve evkāf-ı mezbûre defterine benim üzerimde kayd edip tasarruffu için elime temessük def‘ ve i‘tâ etmişdir. Nazar olunup istihkâm için mûcebince yedime hüccet-i şer‘iyye dahi verilmek matlûbumdur deyu mütevellî-i mezbûrun imzâsıyla mümzâ ve hatemi ile mahtûm ve târîh-i kitâb şehrinin evâhiri ile müverrah temessükünü ibrâz edip nazar olundukda min-külli’l-vücûh kelâmına mutâbık bulunmağın savb-ı şer‘-i şerîfden mûcebince işbu hurûf ber-sebîl-i temessük ketb ve imlâ ve yed-i tâlibe def‘ ve i‘tâ olundu ki lede’l-hâce müzekkir-i mâ-cerâ ola. Tahrîren fi’l-yevmi’l-hâmis ve ve’l-ışrîn min-Şa‘bâni’l-mu‘azzam li-sene isneyn ve selâsîn ve elf. Şühûdü’l-hâl: Fahrü’l-müderrisîn Mahmud Efendi b. Ömer el-kâtib, Halil Efendi b. Mahmud el-kâtib, Mehmed Çelebi b. Abdülgani, Mustafa b. Lutfullah el-bevvâb, Mehmed Çelebi b. Musa el-Eyyûbî, Hasan Çelebi b. Hüseyin el-mi‘mâr.