Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 407 Hüküm no: 350 Orijinal metin no: [114b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ördek Dede Vakfı’nın nakit gelirinin Haremeyn’in eski mütevellisi Veli Bey’den alındığı Bi’l-fi‘il Haremeyn-i Muhteremeyn Evkāf-ı şerîfesine mütevellî olan ebnâ-i sipâhiyândan fahrü’l-akrân Hüseyin Bey b. Memi meclis-i şer‘-i şerîfde evkāf-ı mezbûreye sâbıkā mütevellî olan Veli Bey b. Abdullah nâm bevvâb-ı sultânî mahzarında ikrâr u i‘tirâf edip Ördek Dede demekle ma‘rûf Sinan Dede’nin Medîne-i Münevvere fukarâsına vakfettiği otuz bin akçe Ahmed b. Aydın nâm kimesne zimmetinde olup dört seneden beri meblağ-ı merkūmun ribhi alınmamış idi. Hâlâ nükūd-ı mezbûrenin dört senede vâki‘ olan on iki bin akçe ribhi merkūm Veli Bey yedi ile bana vâsıl olup ben dahi ribh-i mezbûr on iki bin akçeyi bi’t-tamâm ve’l-kemâl mezkûr Veli Bey yedinden ahz ve kabz eyledim dedikde mukırr-ı merkūm Hüseyin Bey ikrâr-ı meşrûhunda el-mukarru-lehü’l-merkūm Veli Bey vicâhen tasdîk ettikden sonra bi’t-taleb ketb olundu. Tahrîren fî-evâsıtı Şevvâli’l-mükerrem li-sene isneyn ve selâsîn ve elf. Şühûdü’l-hâl: Mehmed Çelebi b. Abdülgani, Mustafa Çelebi. Mehmed Çelebi b. Musa.