Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 408 Hüküm no: 351 Orijinal metin no: [114b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kuyumcubaşı Cafer Ağa’nın vakfı olan evi kiralayan Mahmud Bey’in verdiği parayı Haremeyn mütevelllisi Hüseyin Ağa’dan geri aldığı Mahmiye-i Kostantıniyye mahallâtından merhûm Davud Paşa mahallesi sâkinlerinden olan Solak demekle ma‘rûf ebnâ-i sipâhiyândan Mahmud Bey b. Ali nâm cündi meclis-i şer‘-i şerîfde sâhibü hâze’l-kitâb Haremeyn-i Muhteremeyn Evkāf-ı şerîfelerine bi’l-fi‘il mütevellî olan ebnâ-i sipâhiyândan fahrü’l-emâsil ve’l-emâcid Hüseyin Ağa b. Memi muvâcehesinde ikrâr ve takrîr-i kelâm kılıp mahalle-i mezbûrede vâki‘ bir tarafı Tabîb Mustafa Çelebi b. Şemseddin mülkü ve bir tarafı Kâtib-i Dîvân-ı âlî Mehmed Efendi mülkü ve bir tarafı Kamer Hatun vakfı ve bir tarafı tarîk-i âm ile mahdûd olan menzil ki merhûm Kuyumcubaşı Ca‘fer Ağa’nın süknâsı olup evvelâ kendi nefsine ve ba‘dehû utekāsına vakf ve şart etmişdir. Sâbıkā Haremeyn-i Muhteremeyn Evkāf-ı şerîfesine mütevellî olan hâzır bi’l-meclis Veli Bey el-bevvâbü’s-sultânî menzil-i mezbûru Haremeyn-i Şerîfeyn [115a] evkāfına intikāl etmişdir deyu cânib-i evkāf-ı mezbûreden otuz iki akçe icâre-i mu‘accele ve ücret-i müeccele ile taht-ı tasarrufumda iken merhûm ve mezbûr Ca‘fer Ağa’nın utekāsından Handan b. Abdullah nâm kimesne menzil-i mezbûrun süknâsı hakk-ı meşrûtu idiğini şer‘le isbât edip yedimden almağla ben dahi evkāf-ı mezbûre cânibine benden ahz olunan otuz iki bin akçe icâre-i mu‘accelemi hâkim ile evkāf-ı mezbûre mâlından müşârun-ileyh Hüseyin Ağa yedinden bi’t-tamâm ve’l-kemâl ahz ve kabz ettim ba‘de’l-yevm evkāf-ı mezbûrede vechen mine’l-vücûh hakkım kalmadı dedikde minvâl-i meşrûh üzere sudûr eden ikrârını el-mukarru-lehü’l-merkūm Hüseyin Ağa vicâhen tasdîk edicek mâ-vaka‘a bi’t-taleb ketb olundu. Fî-evâhiri Şa‘bân li-sene isneyn ve selâsîn ve elf. Şühûdü’l-hâl: Halil Efendi el-müderris, Mahmud Efendi el-müderris, Ca‘fer Efendi b. Emir el-müderris, Mehmed Çelebi b. Abdülgani.