|
Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 96 Hüküm no: 12 Orijinal metin no: [2b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Fâtıma bt. Yusuf’un Hatice bt. Dilâver’deki eşya bahasından alacağını taksitlendirdiği
Mahmiye-i İstanbul’da Burmalı Mescid mahallesi sâkinelerinden Fâtıma bt. Yusuf nâm hâtun meclis-i şer‘de işbu bâ‘isetü’l-kitâb Hatice bt. Dilâver nâm hâtun mahzarında ikrâr ve takrîr-i kelâm edip mezbûre Hatice zimmetinde yedimden müşterâ ve makbûz beynimizde ma‘lûm entari ve gömlek ve serpûş ve sâir eşyâ semenlerinden beş bin akçe hakkım olup meblağ-ı mezbûru merkūme Hatice def‘aten edâya iktidârı olmayıp taksîte tâlib olmağın târih-i kitâbdan kırk gün tamâmında bin altı yüz akçesin vermek üzre ve meblağ-ı bâkī üç bin dört yüz akçeyi dahi kırk gün tamâmından sonra her otuz gün tamâmında ikişer yüz akçe vermek üzre beş yüz on gün tamâmına değin taksît edip ol dahi taksît-i mezbûru kabûl ve meblağ-ı mezbûru vech-i muharrer üzre edâya ta‘ahhüd eyledi dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-ışrîn min şehri Rebî‘ilâhir li sene seb‘a ve seb‘în ve elf.
Şuhûdü’l-hâl: Hüseyin Çavuş el-Mübâşir, Şükrullah Bey b. Mustafa, Mehmed Efendi b. Mustafa, Mehmed b. Ramazan.
|