Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 96 Hüküm no: 13 Orijinal metin no: [2b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Çelebi b. Ali’nin evini Raziye bt. Abdullah’a sattığı Mahmiye-i İstanbul’da Hatice Sultan mahallesi ahâlîsinden Hasan Çelebi b. Ali nâm kimesne meclis-i şer‘-i hatîr-i lâzımü’t-tevkīrde bâ‘isetü’l-kitâb Râziye bt. Abdullah nâm hâtun mahzarında ikrâr ve takrîr-i kelâm edip akd-i âtînin sudûruna değin yedimde mülküm ve hakkım olup mahalle-i mezbûrede vâki‘ bir tarafdan tarîk-i âm ve bir tarafdan Suyolcu Ramazan Beşe tasarrufunda olan vakıf menzil ve iki tarafdan müşteriye-i merkūme mülkü ile mahdûd fevkānî iki bâb oda ve bir sofa ve tahtânî bir bâb oda ve bir ahır ve kenîf ve havluyu müştemil mülk menzilimi merkūme Râziye’ye tarafeynden îcâb ve kabûl[ü] hâvî şurût-ı müfsideden ârî bey‘-i bâtt-ı sahîh-i şer‘î ile iki yüz kıt‘a esedî guruşa bey‘ ve teslîm edip ol dahi iştirâ ve tesellüm ettikden sonra semen-i mezbûru tamâmen yedinden ahz u kabz eyledim, min ba‘d menzil-i mahdûd-ı mezkûr merkūm Râziye’nin mülk-i müşterâsıdır keyfe mâ teşâ’ ve tahtâr mutasarrıfe olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-ışrîn min şehri Rebî‘ilâhir li sene seb‘a ve seb‘în ve elf. Şuhûdü’l-hâl: Hasan Efendi b. Bayram el-İmâm, Abdi Efendi b. Ahmed el-İmâm, Mustafa Çelebi b. Mehmed el-Müezzin, Abdülkerim Çelebi el-Müezzin, Ali Çelebi b. Mehmed, İbrahim Efendi b. Mahmud, Mahmud Beşe b. Ahmed, Ahmed Beşe b. Receb, Abdi Beşe b. Hacı Mehmed, Hasan Çelebi b. Mehmed.