Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 431 Hüküm no: 374 Orijinal metin no: [122a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tüccar taifesinden Sergis v. Aydın’ın satın aldığı evin vakıf olduğunun ispatlanması üzerine evi vakıftan kiralaması Sâhibü hâze’l-kitâb tüccâr tâifesinden Sergis v. Aydın nâm Ermeni meclis-i şer‘-i şerîfde bi’l-fi‘il Haremeyn-i Muhteremeyn Evkāfı mütevellîsi olan Ali Bey b. Mehmed el-Cündî ve Mâhıtâb bt. Abdullah mahzarında takrîr-i kelâm ve ta‘bîr ani’l-merâm kılıp mahmiye-i Kostantıniyye mahallâtından Kâtib Kasım mahallesinde vâki‘ bir tarafı Sipâhiler Kâtibi Ali Efendi el-Cündî mülkü ve Bevvâb Ali Bey b. Abdullah mülkü ve bir tarafı Solak mülkü ve tarafeyni tarîk-i âm ile mahdûd arzı tûlen otuz sekiz ve arzen dahi otuz sekiz şatrancî hesâbı ile cem‘an bin dört yüz otuz zirâ‘ ile takdîr olan menzil müteveffâ Ali Ağa nâm kimesnenin tasarrufunda olup mezbûr Ali Ağa vefât ettikde zevce-i metrûkesi merkūme Mâhıtâb ve sâir verese menzil-i mezbûru merkūm Ali Ağa’dan mevrûs mülkleri olmak üzere bana bey‘ ve mezkûre Mâhıtâb semen-i menzilden kendinin rub‘ hissesi nâmına olan elli bin akçeyi benden ahz u kabz edip ben dahi iştirâ ettiğimden sonra sâlifü’z-zikr menzili kābilü’s-süknâ olmamağla kendi mâlım ile bahçe tarafından bir cedîd kasr ve ondan gayrı yedi bâb oda ve şehnişîn ve zîr-i zemîn ve turre ve havlu içinde kaldırım binâ edip nice müddetden beri mülkiyyet üzere mutasarrıf iken mütevellî-i merkūm Ali Bey menzil-i mezbûr merkūm Ali Ağa’nın zevcesi Suriyye Hatun’un [122b] mülkü olup mülkünde iken evvelâ nefsine, ba‘de vefâtihâ zevci merkūm Ali Ağa’ya, ba‘dehû mezbûre Mâhıtâb Hatun’a, ba‘dehâ Medîne-i Münevvere fukarâsına vakf ve şart etmişdim deyu mezkûre Suriyye Hatun’un mülknâ[me]si ve vakıfnâmesini ibrâz edip ben dahi mazmûnların münkir olduğumda mütevellî-i mezbûr Ali Bey mazmûnlarını şer‘le benim muvâcehemde isbât edip menzil-i mezbûrun vakfiyetine hüküm olundukdan sonra mütevellî-i mezbûr ba‘de’l-isbât vaz‘-ı yed edip icâreye vermek murâd ettikde ben menzil-i mezbûrda birkaç yük akçe eser-i binâm vardır, eser-i binâmın tahammülü görülüp ben zü’l-yed olduğum hasebi ile yine bana îcâr olunsun demeğin cânib-i şer‘-i şerîfden hâssa muhamminler üzerine varıp benim ebniyemi takvîm ettiklerinde benim binâmı iki yüz elli altı bin altı yüz yetmiş altı akçeye tahmîn edip mütevellî-i mezbûr dahi icâre-i mu‘acceleye mahsûb olmak üzere kırk bin akçe cânib-i vakf için benden ahz u kabz edip târîh-i kitâb gününden beher yevm üçer akçe ücret-i müeccele ile menzil-i mezbûru îcâr ettikden sonra tasarrufu için yedime temessük def‘ etmişdir, nazar olunup mûcebince hüccet-i şer‘iyye dahi verilmek matlûbumdur deyu ben otuz üç senesi Zilka‘desi’nin evâsıtı ile müverrah mütevellî-i mezbûrun temessüğünü ibrâz edip nazar olundukda her vechile kelâm-ı meşrûhuna mutâbık bulunmağın mûcebince savb-ı şer‘-i şerîfden işbu hurûf-ı pür-sebîl temessük ketb ve yedine def‘ olundu. Tahrîren fî-evâsıtı Zilka‘deti’ş-şerîfe li-sene selâse ve selâsîn ve elf. Şühûdü’l-hâl: Fahrü’l-akrân Hüseyin Ağa el-müteferrika, Veli Halîfe b. Mehmed el-imâm, Hüseyin Bey b. el-Hâc Durmuş el-müezzin, Ömer Efendi b. Durmuş, Sefer Çelebi b. Osman, Ali Efendi b. Bâli, Mehmed b. Durmuş, Veli b. Süleyman et-tâcir, Hâfız Mehmed b. el-Hâc Mustafa, Ali b. Ahmed, Üstâd Mahmud b. Abdullah, Veli b. Süleyman, Ali b. Ahmed, Halil Efendi b. Mahmud el-müderris, Abdülhalim Efendi b. Mehmed el-müderris, Mehmed Çelebi b. Abdülgani, Hasan Çelebi b. Hüseyin Mi‘mâr-ı Ayasofya, Ali Çelebi b. Halil Mi‘mâr-ı Haremeyn ve gayruhüm.