Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 430 Hüküm no: 373 Orijinal metin no: [121b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Katib Kasım mahallesinde Receb Ağa b. Mehmed ve Sergis v. Aydın’ın elinde olan evin Suriyye Hatun Vakfı olduğu Bi’l-fi‘il Haremeyn-i Muhteremeyn Evkāf-ı şerîfesine mütevellî olan ebnâ-i sipâhiyândan Ali Bey b. Mehmed meclis-i şer‘-i şerîfde menzil-i âti’z-zikre ber-vech-i iştirâk vâzı‘ânü’l-yed olan Receb Ağa b. Mehmed ve Sergis v. Aydın ez-zimmî mahzarlarında tevliyeti hasebi ile da‘vâ ve takrîr-i kelâm kılıp mahmiye-i Kostantıniyye’de Kâtib Kasım mahallesinde vâki‘ etrâf-ı erba‘ası el-Hâc Mehmed b. Abdullah es-serrâc ve Abdulbâki Çelebi el-Kâtib ve Davud b. İvaz mülkleri ve tarîk-i âm ile mahdûd olup üç bâb süflî odayı ve üç bâb ulvî odaları ve iki sofayı ve bi’r-i mâyı ve fırını ve kenîfi müştemil olan menzil Saraylı demekle ma‘rûfe Suriyye bt. Abdullah nâm hatunun mülkü olup mülkünde iken bin iki senesi Cumâdelâhire’sinin evâhirinde Kassâm-ı askerî olan İbrahim Efendi b. Ahmed huzûrunda vakf-ı sahîh-i şer‘ile evvelâ kendi nefsine ba‘de vefâtihâ zevci Ali Ağa’ya ba‘dehû evlâdına ba‘de’l-inkırâzi’l-evlâd utekāsına ba‘de’l-inkrâzi’l-utekā Mâhıtâb bt. Abdullah’a ba‘dehâ Medîne-i Münevvere fukarâsına vakf ve teslîm-i mütevellî ve tescîl-i şer‘î edip hâlâ menzil-i mezbûr fukarâ-i mezkûreye intikāl etmeğin mezbûrân kasr-ı yed edip cânib-i vakfdan bana zabt ettirilmek matlûbumdur dedikde gıbbe’s-suâl merkūmân Receb Ağa ve Sergis cevâblarında menzil-i mezbûru mezkûre Suriyye Hatun’un zevci merkūm Ali Ağa iştirâ edip ba‘dehû vefât ettikde veresesi bize bey‘ etmişdir. Menzil-i mezbûr merkūm Ali Ağa’nın müşterâsı olduğuna Ali Ağa nâmında elimizde hüccet-i şer‘iyyemiz dahi vardır mezbûre Suriyye Hatun’un mülkü olup ba‘dehû mülkünde iken vakfettiğine bizim ma‘lûmumuz değildir deyicek mütevellî-i mezbûr Ali Bey iâde-i kelâm edip mezbûr Ali Ağa menzil-i mezbûru merkūme Suriyye Hatun tarafından iştirâya vekîl olup hîn-i iştirâda menzil-i kendi nâmına hüccet ettirip ba‘dehû merkūme Suriyye Hatun husûs-ı mezbûra muttali‘a oldukda zevci ile da‘vâsı istimâ‘ olunması için hatt-ı hümâyûn-ı saâdet-makrûn ihrâc edip ihdâ ve elf senesi Şa‘bânü’l-mu‘azzamı’nın yirmi üçüncü günü Kassâm-ı askerî olan Mevlânâ Receb b. Mehmed Sarây-ı atîk-i sultânîye gelip akd-i meclis olundukda sarây-ı mezbûre ağalarından Kābil Ağa mezbûre Suriyye Hatun’un vekîli olup bi’l-vekâle da‘vâ edicek mezbûr Ali Ağa menzil-i mezbûru zevcesi Suriyye Hatun mâlı ile Suriyye için vekâleten iştirâ edip [122a] menzil dahi merkūme Suriyye Hatun’un mülk-i müşterâsı olduğun ikrâr u i‘tirâf edip ikrâr u i‘tirâfı dahi sicil ve mülknâme tahrîr olunmuşdur. Ol mülknâme hâlâ bizim yedimizdedir deyu Kassâm-ı mûmâ-ileyh Receb Efendi’nin imzâsıyla mümzâ ve hatemi ile mahtûm ve târîh-i mezbûr ile müverrah mülknâmesi ve sonra kassâm olan İbrahim Efendi’nin imzâsıyla mümzât ve hatemi ile mahtûme ve isneyn ve elf senesi Cumâdelâhire’sinin evâhiri ile müverraha vakfiyyesini ibrâz edip hasmeyn-i merkūmeyn muvâcehelerinde kırâat olundukda mülknâme ve vakfiyyenin mazmûnlarını münkirân olıcak mütevellî-i mezbûr Ali Bey’den takrîrine mutâbık beyyine taleb olundukda Sarây-ı atîk bevvâbları kethüdâları olan kıdvetü’l-a‘yân Mustafa Ağa b. Abdülmennan ve fahrü’l-eşbâh Hüseyin Bey b. Abdullah nâm kimesneler li-ecli’ş-şehâde meclis-i şer‘-i şerîfe hâzırûn olup gıbbe’l-istişhâd edâ-i şehâdet-i şer‘iyye kılıp fi’l-hakīka zikr olunan menzil husûsu da‘vâsı şer‘le istimâ‘ olunmak için hatt-ı hümâyûn-ı saâdet makrûn sudûr bulup imtisâlen-leh sarây-ı mezbûrda akd-i meclis olunup da‘vâları istimâ‘ olundukda merkūm Ali Ağa sâlifü’z-zikr menzili zevcesi mezbûre Suriyye Hatun’un mâlı ile mezkûre Suriyye Hatun için iştirâ dahi ettiğin bizim huzûrumuzda ikrâr u i‘tirâf eyledi. Ba‘dehû mezbûre Suriyye Hatun dahi menzil-i mezbûru mülkünde iken vakf-ı sahîh ile vakf ve teslîm-i mütevellî ve tescîl-i şer‘î dahi eyledi bu husûsa şâhidleriz şehâdet dahi ederiz deyu mârrü’l-beyân mülknâme ve vakfiyyenin mazmûnlarına mutâbık şehâdet-i şer‘iyye ettiklerinde gıbbe’t-tezkiye ve’t-ta‘dîl şehâdetleri hayyiz-i kabûlde vâki‘ olıcak mûceb-i şehâdetleri ile hükmolunup mezbûrân Receb Ağa ve Sergis kasr-ı yed etmelerine tenbîh olundu. Tahrîren fî-evâhiri Zilka‘deti’ş-şerîfe li-sene selâse ve selâsîn ve elf min-hicreti men-lehü’l-izzü ve’ş-şeref. Şühûdü’l-hâl: Veli Bey b. Abdullah el-bevvâbü’s-sultânî, Ali Çelebi b. Halil Mi‘mâr-ı Haremeyn, Mehmed Çelebi b. Abdülgani, Halil Efendi el-müderris, Abdülhalim Efendi el-müderris ve gayruhüm.