Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 537 Hüküm no: 475 Orijinal metin no: [156a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Medine-i Münevvere Evkafı mütevellisi İsmail Çelebi’nin Hakkakbaşı Haydar Ağa tarafından vakfedilen evi teslim alması Mahmiye-i Kostantıniyye’de vâki‘ Medîne-i Münevvere -sallallâhü te‘âlâ alâ-münevvirihâ- Evkāfı’na mütevellî olan fahrü’l-a‘yân ve’l-eşbâh İsmail Çelebi b. Mehmed meclis-i şer‘-i şerîf-i lâzımü’t-teşrîfde takrîr-i kelâm edip mahmiye-i mezbûrede Daye Hatun-ı Atîk mahallesinde vâki‘ bir tarafı sikkezenbaşı olan Yusuf Ağa mülkü ve bir tarafı yine vakf-ı âti’z-zikr ve bir tarafı tarîk-i hâs ile mahdûd bir bâb tahtânî odayı ve sâhayı müştemil olan menzili mukaddemâ merhûm olan hakkākbaşı Haydar Ağa utekāsından Yasemin bt. Abdullah’a ba‘de vefâtihâ Medîne-i Münevvere fukarâsına vakf etmişdi, el-hâletü hâzihî mezbûre Yasemin vefât edip menzil-i mezkûr vakfa âid olmuşdur, savb-ı şer‘den üzerine varılıp keşf olunmak matlûbumdur dedikde kıbel-i şer‘den Mevlânâ Hasan Efendi ve hâssa mi‘mârlardan Üstâd Ali Çelebi b. Halil ve zeyl-i sütûrda isimleri mastûr olan Müslimîn ile üzerine varılıp mu‘âyene ve mesâha ettiklerinde fi’l-hakīka menzil-i mezkûrun tahtânî bir bâb odası harâba müşrif olup bennâ zirâ‘ıyla tûlen on dört zirâ‘ ve arzen altı buçuk zirâ‘ bi-hesâb-ı şatrancî doksan bir zirâ‘ arsası olduğu ta‘yîn ve ittifâk ettiklerini mevlânâ-yı mezbûr mahallinde tahrîr ba‘dehû gelip meclis-i şer‘de inhâ ve takrîr etmeğin mâ-hüve’l-vâkı‘ [bi’t-taleb ketb olundu]. Hurrire fî-evâili Cemâziyelâhire sene seb‘a ve selâsîn ve elf. Şühûdü’l-hâl: Yusuf Bey b. ( ) el-müteferrika, Ali Bey b. Abdullah el-bevvâb, İbrahim Bey b. Mustafa, Ali Çelebi b. Hızır.