Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 536 Hüküm no: 474 Orijinal metin no: [156a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ruznameci İbrahim Efendi’nin Medine-i Münevvere Vakfı’na ait Sultan Süleyman Camii mahallesindeki evi kiralaması Atebe-i Aliyye-i Sultâniye’de rûznâme-i hümâyûn hizmetiyle müşerref olan iftihârü erbâbi’t-tahrîr ve’t-tibyân muhtâru ashâbi’t-takrîr ve’l-irfân sâhibü’d-devleti’l-aliyye ve’l-ikbâl sâhibü ezyâli’l-mecd ve’l-iclâl Hazret-i İbrahim Efendi b. ( ) taraf-ı karînü’ş-şereflerinden husûs-ı âti’l-beyâna vekîl olup vekâleti nehc-i şer‘iyy-i mu‘teber üzere sâbite olan mefharü’l-emâsil ve’l-akrân Kasım Ağa b. Abdülmennan meclis-i şer‘de bi’l-vekâle takrîr-i kelâm edip mahmiye-i Kostantıniyye’de vâki‘ merhûm Sultân Süleyman -tâbe serâhu- hazretleri Câmi‘-i şerîfi mahallesinde merhûm Lalezârzâde Medîne-i Münevvere -sallallâhü te‘âlâ alâ-münevvirihâ- fukarâsına vakf edip bir tarafı Derviş Efendi Vakfı ve bir tarafı Ahmed Paşa Vakfı ve bir tarafı Kamer Hatun Vakfı ve iki tarafı tarîk-i âm ile mahdûd vakıf menzili cümle müştemilâtıyla Saliha Hatun bt. ( ) icâre-i mu‘accele ve müeccele ile mutasarrıfe iken vefât edip evlâdı kalmamağla menzil-i mezkûr vakf-ı mezbûra âid olmağın vakf-ı merkūm mütevellîsi olan İsmail Çelebi b. Mehmed menzil-i mezkûru Sûk-ı Sultânî’de tâlibine arz edip ragabât-ı nâs münkatı‘a oldukda yüz bin akçe icâre-i mu‘accele ile müvekkilim müşârun-ileyh üzerinde karâr etmekle mütevellî-i mezbûr menzil-i mezkûru müvekkilim müşârun-ileyhe meblağ-ı mezbûr yüz bin akçe icâre-i mersûme ve beher şehr yüz elli akçe icâre-i müeccele ile îcâr edip ol dahi istîcâr ve kabûl eyledikden sonra mütevellî-i mezbûr meblağ-ı mezbûr yüz bin akçeyi vakf-ı mezbûr için müvekkilim müşârun-ileyh yedinden tamâmen alıp kabz eyledikde icâre-i mu‘accelesine mahsûb olmak üzere menzil-i mezkûrda küllî ve cüz’î binâ ihdâsına mütevellî-i mezbûr müvekkilim müşârun-ileyhe izin birle târîh-i kitâb şehri gurresiyle müverrah hatem ve imzâsını müştemil müvekkilim müşârun-ileyh yedine tezkire vermişdi, el-hâletü hâzihî tezkire-i mezbûreye nazar olunup mûcebince savb-ı şer‘den dahi hüccet-i şer‘iyye verilmek matlûbumdur dedikde vekîl-i mesfûr yedinde olan tezkire-i merkūmeye nazar olunup mazmûnu takrîrine muvâfık bulunmağın mâ-hüve’l-vâkı‘ gıbbe’t-taleb ketb olundu. Fî-evâili Cemâziyelâhire sene seb‘a ve selâsîn ve elf. Şühûdü’l-hâl: Ali Bey b. Abdullah el-bevvâbü’s-sultânî, Mustafa Çelebi b. ( ) Kâtib-i vakf-ı mezbûr, Ali Çelebi b. Hızır Câbî-i vakf-ı mezbûr, İbrahim Bey b. ( ) Câbî-i vakf-ı mezbûr, Muharrirü’l-hurûf Hasan Efendi el-kādî.