Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 538 Hüküm no: 477 Orijinal metin no: [156b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Medine-i Münevvere Evkafı mütevellisi İsmail Çelebi’nin Ayşe Hatun bt. Ahmed tarafından vakfedilen evi teslim alması Mahmiye-i Kostantıniyye’de vâki‘ Medîne-i Münevvere -efdalü’t-tahiyyeti alâ-münevvirihâ- Evkāfı’na mütevellî olan mefharü’l-emâsil ve’l-akrân İsmail Çelebi b. Mehmed meclis-i şer‘-i şerîf-i Nebevî’de takrîr-i kelâm edip mahmiye-i mezbûrede Zeyrek Câmi‘i mahallesinde sâkine iken vefât eden Âişe Hatun bt. Ahmed hâl-i sıhhatinde mahalle-i mezbûrede [vâki‘] bir tarafı merhûme-i mezbûre Âişe Hatun ulemâya vakf ettiği menzil ve bir cânibi mu‘takası Müşerrefe bt. Abdullah’a vakf ettiği menzil ve bir tarafı Ahmed Efendi ve Âişe bt. Yunus mülkleri ve bir tarafı tarîk-i âm ile mahdûd olup fevkānî ve tahtânî iki bâb odayı ve iki sofayı ve dahlîzi ve sâhayı müştemil olan mülk menzilini evvelâ nefsine, ba‘de vefâtihâ Medîne-i Münevvere fukarâsına vakf ve şart etmişdi, el-hâletü hâzihî menzil-i mezkûr vakf-ı şerîfe âid olmuşdur, savb-ı şer‘den üzerine varılıp keşf ve tahrîr olunmak matlûbumdur dedikde kıbel-i şer‘den Mevlânâ Hasan Efendi b. Abdünnebî irsâl olunup ol dahi hâssa mi‘mârlardan Üstâd Ali Çelebi b. Halil ve zeyl-i sütûrda isimleri mastûr olan Müslimîn ile üzerine varılıp mu‘âyene ve mesâha ettiklerinde fi’l-hakīka menzil-i mezkûrun bennâ zirâ‘ıyla tûlen otuz zirâ‘ ve arzen on beş zirâ‘ bi-hesâb-ı şatrancî dört yüz elli zirâ‘ arsası olduğunu ta‘yîn ve ittifâk ettiklerinde vâki‘ hâli mevlânâ-yı mezbûr mahallinde tahrîr ba‘dehû gelip meclis-i şer‘de inhâ ve takrîr etmeğin mâ-hüve’l-vâkı‘ bi’t-taleb ketb olundu. Fî-evâili Cemâziyelâhire li-sene seb‘a ve selâsîn ve elf min-hicreti men lehü’l-izzü ve’ş-şeref. Şühûdü’l-hâl: Fahrü’l-akrân Yusuf Ağa b. ( ) el-müteferrika, Ali Çelebi b. Hâzır el-câbî, İbrahim Bey b. Mustafa el-câbî, Mustafa Çelebi b. ( ) el-kâtib.