Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 539 Hüküm no: 478 Orijinal metin no: [157a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Medine-i Münevvere Evkafı mütevellisi İsmail Çelebi’nin Abdulbâki Çelebi b. Receb tarafından vakfedilen evi teslim alması Mahmiye-i Kostantıniyye’de vâki‘ Medîne-i Münevvere -şerrefehallâhü te‘âlâ fi’d-dünyâ ve’l-âhire- Evkāfı’na bi’l-fi‘il mütevellî olan kıdvetü’l-emâsil ve’l-eşbâh İsmail Çelebi b. Mehmed meclis-i şer‘-i şerîf-i hatîr-i lâzımü’t-tevkīrde takrîr-i kelâm ve ta‘bîr ani’l-merâm edip vakf-ı mezbûrdan olup mahrûsa-i Galata’da Yolcuzâde mahallesinde iki tarafı yine vakf-ı mezbûr ve iki tarafı tarîk-i âm ile mahdûd iki bâb fevkānî ve iki bâb tahtânî odaları ve dahlîzi ve sofayı müştemil olan vakıf menzile icâre-i mu‘accele ve müeccele ile mutasarrıf olan Abdulbâki Çelebi b. Receb fevt olup evlâdı olmamağla menzil-i mezkûr vakf-ı merkūma âid olmuşdur, savb-ı şer‘den üzerine varılıp keşf olunmak matlûbumdur dedikde kıbel-i şer‘den Mevlânâ Hasan Efendi ve hâssa mi‘mârlardan Üstâd Ali Çelebi b. Halil ve zeyl-i sütûrda isimleri mastûr olan Müslimîn ile üzerine varılıp mu‘âyene ve mesâha ettiklerinde fi’l-hakīka menzil-i mezkûrun bennâ zirâ‘ıyla tûlen on üç zirâ‘ altı parmak ve arzen on üç zirâ‘ bi-hesâb-ı şatrancî yüz yetmiş iki zirâ‘ arsası olduğunu ta‘yîn ve ittifâk ettiklerinde vâki‘ hâli mevlânâ-yı mezbûr mahallinde tahrîr ba‘dehû meclis-i şer‘a gelip inhâ ve takrîr etmeğin mâ-hüve’l-vâkı‘ bi’t-taleb ketb olundu. Fî-evâili Cemâziyelâhire li-sene seb‘a ve selâsîn ve elf. Şühûdü’l-hâl: Ali Çelebi b. Hızır el-câbî, Mustafa Çelebi b. ( ) el-kâtib, Dilaver Bey b. ( ) el-câbî, İbrahim Bey b. ( ) el-câbî ve gayruhüm.