Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 106 Hüküm no: 27 Orijinal metin no: [4a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Murad b. Ahmed’in tülbent satışından Mustafa b. Receb’de kalan alacağını Vartan v. Manuk’tan aldığı Kerpiççi tâifesinden Murad b. Ahmed nâm kimesne meclis-i şer‘-i hatîr-i lâzımü’t-tevkīrde Mustafa b. Receb nâm kimesne mahzarında ikrâr ve takrîr-i kelâm edip târih-i kitâbdan sekiz sene mukaddem bi gayrı hakkın doksan altı esedî guruş ile beş guruş kıymetli bir tülbentimi ahz u kabz etmişdin deyû merkūm Mustafa’dan mukaddemâ meblağ-ı mezbûr doksan altı guruş ile zikr olunan tülbentimi da‘vâ ve taleb ettiğimde ol dahi inkâr etmeğin beynimizde münâza‘ât-ı kesîre vakı‘a olmuşidi el-hâletü hâzihî muslihûn tavassut edip mezbûr Mustafa ile beynimizde otuz esedî guruş üzerine inşâ-i akd-i sulh ettiklerinde ben dahi sulh-i mezbûru kabûl ve bedel-i sulh olan meblağ-ı mezbûr otuz esedî guruşu merkūm Mustafa’nın gāib ani’l-meclis Vartan v. Manuk nâm Ermeni zimmetinde otuz esedî guruş hakkı olmağın üçümüz bir meclisde iken merkūm Mustafa Beşe mezbûr Vartan’ın üzerine havâle-i sahîha-i şer‘iyye ile havâle edip ben dahi kabûl edip ba‘de’l-yevm husûs-ı mezbûra müte‘allika de‘âvâdan merkūm Mustafa’nın zimmetini ibrâ [ve] iskāt eyledim dedikde gıbbe’t-tasdîk mâ vaka‘a bi’t-taleb ketb olundu. Fi 20 Rebî‘ulâhir sene [10]77. Şuhûdü’l-hâl: Hasan el-Müezzin, Ebûbekir b. Hüseyin, Murad Beşe [b.] Musli, Hüseyin Beşe b. Halil, Halil [b.] İlyas.