Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 580 Hüküm no: 523 Orijinal metin no: [168a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gazi Mustafa Ağa tarafından vakfedilip Haremeyn Evkafı’na intikal eden evin Osman Beşe b. Abdülmennan’a kiraya verilmesi Mahrûsa-i İstanbul’da vâki‘ Haremeyn-i Şerîfeyn Evkāfı’na bi’l-fi‘il mütevellî olan fahrü’l-akrân İsmail Çelebi b. Mehmed meclis-i şer‘de hâfızü hâze’l-kitâb Osman Beşe b. Abdülmennan mahzarında ikrâr edip mahrûsa-i mezbûre hısnı ebvâbından Eğrikapı dâhilinde merhûm Emîr Buharî -aleyhi rahmetü’l-bârî- Zâviyesi kurbünde el-Hâc İlyas mahallesi sâkinlerinden olup bundan akdem vefât eden merhûm Gazi Mustafa Ağa tasarrufunda olan emlâkinden mahalle-i mezbûrede vâki‘ bir tarafı Şah Sultan Medresesi hucurâtına ve bir tarafı mülk-i İsmihan’a ve bir tarafı sedd-i kâfirîye ve taraf-ı âharı tarîk-i âm ile mahdûd olup hâricinde bir süflî beyti ve bir ahırı müştemil olup ve dâhiliyyesinde iki bâb beyt-i ulvî ve iki bâb beyt-i süflî ve bir kîlâr ve bir matbahı ve zîr-i zemîn ve hadîka ve muhavvatayı müştemil olan menzilini vakf edip süknâsını evvelâ kendüye ba‘dehû oğlu Mehmed Çavuş ile kızı Neslihan’a ve zevce-i metrûkesi Sakine’ye şart edip ba‘dehüm utekāsına ve evlâd-ı utekāsına, anların inkırâzından sonra Haremeyn-i Şerîfeyn fukarâsına şart ettiği vakfiyesinde mastûr olmağın ber-mûceb-i vakfiye meşrûtün-aleyhâ olanlardan kimesne kalmayıp menzil-i merkūm vech-i merkūm üzere taraf-ı vakf-ı şerîfe âid oldukdan sonra beyne’t-tâlib müzâyede olunup ragabât-ı nâs inkıtâ‘ından sonra mezbûr <> Osman üzerinde yedi bin akçe icâre-i mu‘accele ve ayda otuz akçe icâre-i müeccele ile karâr edip ziyâde ile tâlib-i âhar zuhûr etmediği ecilden ben dahi menzil-i merkūmu mezbûr Receb Beşe’ye vech-i meşrûh üzere îcâr edip ol dahi istîcâr ve kabûl ettikden sonra ücret-i mu‘accelesi olan yedi bin akçeyi mezbûr Receb Beşe yedinden bi’t-tamâm ahz u kabz edip tasarrufuna izin verdim dedikde gıbbe’t-tasdîk vicâhen mâ-hüve’l-vâkı‘ bi’t-taleb ketb olundu. Fî-evâhiri evveli’l-cemâzeyn sene 1039. Şühûdü’l-hâl: Fahrü’l-müderrisîn Halim Çelebi b. Mehmed, Halil Efendi [b.] Veli, Ahmed Beşe b. Mahmud, Mehmed Beşe b. Abdullah er-râcil, Mustafa Efendi b. Hasan el-imâm, Mehmed b. ( ) el-müezzin, Abdülkerim b. Kurd, Ali Çelebi b. Halil el-mi‘mâr, Hasan Çelebi b. Hüseyin el-mi‘mâr ve gayruhüm.