Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 579 Hüküm no: 522 Orijinal metin no: [167b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sarayda helvacı olan ve boğularak ölen Mehmed Beşe’nin kardeşinin Ali b. Cafer olduğunun tespiti Vilâyet-i Anadolu’da vâki‘ kasaba-i Koyuluhisarı sâkinlerinden hâfızü hâze’l-kitâb Ali b. Ca‘fer nâm kimesne meclis-i şer‘-i şerîf-i lâzımü’t-tevkīrde müteveffâ-yı âti’l-beyânın alâ-tarîkı’l-emâne muhallefâtına vâzı‘ü’l-yed olduğu nehc-i şer‘î üzere sâbit olup Dârüssaâdeti’s-seniyye ağası olan iftihârü’l-havâs ve’l-mukarrebîn mu‘temedü’l-mülûk ve’s-selâtîn zü’l-kadri’l-aliyyi ve’ş-şâni’l-celî el-mahfûfu bi-sunûfi’l-avâtifi’l-meliki’l-kerîm İdris Ağa b. Abdürrahim mahzarında takrîr-i da‘vâ edip Sarây-ı Cedîd-i Sultânî -dâme medâru’l-emn ve’l-emânî-’de hâssa helvacıları zümresinden olup li-ebeveyn karındaşım olan Mehmed nâm kimesne bundan akdem Galata tevâbi‘inden Fındıklı demekle ma‘rûf mevzi‘de garîkan vefât edip verâseti bana münhasıra olmağla mûmâ-ileyh ağa hazretleri yedinde [168a] tarîkı’l-emâne vaz‘ ettiği esbâbı bana intikāl etmeğin verâsetim hasebi ile taleb ederim, teslîmden imtinâ‘ ederler, vech-i merkūm üzere müteveffâ-yı mezbûr Mehmed li-ebeveyn karındaşım olup verâseti bana münhasıra olduğuna vâkıf maskat-ı re’simizden bunda mevcûd kimesneler olmağın şer‘an istimâ‘ olunup ihkāk-ı hak olunmak matlûbumdur deyicek, gıbbe’s-suâl müşârun-ileyh ağa hazretleri cevâblarında mezbûr Mehmed gider oldukda bazı esvâbını alâ-tarîkı’l-emâne bana vaz‘ ve ben dahi ahz u kabz ve hıfz ettim, lâkin mezbûr Ali müteveffâ-yı mezkûrun li-ebeveyn karındaşım olmağla verâseti mezbûr Ali’ye münhasıra olduğu ma‘lûmum değildir deyu münkir olup mezbûr Ali’den takrîrine mutâbık beyyine taleb olundukda kasaba-i mezbûre sâkinlerinden olup hâlâ Galata Sarâyı’nda Başeski demekle ma‘rûf teberdârândan Himmet Beşe b. Şa‘ban ve sarây-ı mezbûr habbâzlarından Ramazan Beşe b. el-Hâc Bâli ve ebnâ-i sihâhiyândan yüz yirmi beşinci bölükden İbrahim Bey b. Kasım nâm kimesneler meclis-i şer‘a hâzırûn olup müşârun-ileyh ağa hazretleri huzûr-ı âlîlerinde gıbbe’l-istişhâdi’ş-şer‘î edâ-i şehâdet-i şer‘iyye edip fi’l-vâki‘ müdde‘î-i mezbûr Ali garîkan vefât eden helvacıyân-ı hâssadan Mehmed nâm müteveffâ ile li-ebeveyn karındaşları olup babalarının ismi Ca‘fer ve analarının ismi Selime bt. Ömer’dir ve maskat-ı re’sleri kasaba-i mezbûre hisârıdır, müteveffâ-yı mezbûr Mehmed’in verâseti karındaşı merkūm Ali’ye münhasıradır, gayrı vârisi olduğu ma‘lûmum değildir, bu husûsa şâhidleriz ve şehâdet-i şer‘iyye dahi ederiz dediklerinde ba‘de’t-ta‘dîl ve’t-tezkiyye mezbûrûnun şehâdetleri hayyiz-i kabûlde vâkı‘a oldukdan sonra mûcebince hüküm olunup mâ-hüve’l-vâkı‘ bi’t-taleb ketb olundu. Fî-evâsıtı evveli’l-cemâzeyn li-sene tis‘a ve selâsîn ve elf. Şühûdü’l-hâl: Fahrü’l-akrân Receb Ağa b. Mehmed, Hüseyin Çelebi b. Musli, Abdülhalim Çelebi b. Mehmed el-müderris, Hasan b. Abdülmennan, Ali Bey b. Abdülmennan ve gayruhüm.