Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 594 Hüküm no: 536 Orijinal metin no: [174b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haremeyn Vakfı mütevellisi İsmail Çelebi’nin Yemen Beylerbeyisi Cafer Paşa tarafından vakfedilen evi teslim alması Dârü’s-saltanati’s-seniyye Kostantıniyye’de Medîne-i Münevvere -ve alâ-münevvirihâ salavâtu mükerrere- Evkāfı’na bi’l-fi‘il mütevellî olan fahrü’l-akrân İsmail Çelebi b. Mehmed meclis-i şer‘-i şerîfde takrîr-i kelâm edip sâbıkā Yemen beylerbeyisi olup fevt olan merhûm Ca‘fer Paşa hâl-i hayâtında iken mahmiye-i mezbûrede Kadırga Limanı’nda merhûm Mehmed Paşa Câmi‘-i şerîfi kurbünde vâki‘ bir tarafdan İsmail Ağa mülkü ve bir tarafdan Haremeyn-i Şerîfeyn Vakfı ve bir tarafdan merhûm-ı mûmâ-ileyhin zevcesi için vakf eylediği menzil ve bir tarafdan tarîk-i hâs ile mahdûd olup ulvâ ve süflâ büyût-ı müte‘addideyi ve mâ-i cârîyi müştemil olan mülk menzilini vakf ve habs edip evvelâ süknâsını nefs-i nefîsine ba‘de vefâtihî menzil-i mezbûrun muhavvata-i dâhiliyyesinin süknâsını merkūme zevcesine ve muhavvata-i hâriciyyesinin süknâsını sulbî kebîr oğlu Mehmed Bey’e vakf ve şart edip ba‘de vefâtihimâ menzil-i merkūmun mecmû‘unu Medîne-i Münevvere fukarâsına vakf ve şart edip hâlâ zikr olunan muhavvata-i hâriciyyesinin mutasarrıfı olan merhûm Mehmed Bey fevt olmağla mârru’l-beyân muhavvata-i hâriciyye vakf-ı mezbûra âid olmuşdur, tevliyyet-i mahkiyem hasebiyle cânib-i şer‘-i kavîmden üzerine varılıp ba‘de’l-müşâhede mesâha olunup mâ-vaka‘a tahrîr olunmak matlûbumdur dedikde savb-ı şer‘-i şerîfden Mevlânâ Abdullah Efendi b. Veli ve hâssa mi‘mârlardan Üstâd Ali b. Halil irsâl olunup anlar dahi zeyl-i kitâbda mastûrü’l-esâmî olan ehl-i vukūf Müslümânlar ile mârru’z-zikr muhavvata-i hâriciyye üzerine varıp ba‘de’l-müşâhede mesâha ettiklerinde arsası tûlen yüz dört zirâ‘ ve arzen yetmiş zirâ‘ ve bi-hesâb-ı şatrancî yedi bin iki yüz seksen zirâ‘ olup üzerine dîvânhâne ta‘bîr olunur kebîr kâşîli fevkānî oda ve yanında bir hazîne odası ve bir kahve odası ve önünde bir sofa ve bir dîvânhâneye muttasıl bir matbah ve bir kîlâr ve dîvânhâne altında ulvâ ve süflâ birbiri üzerinde üç bâb odalar ve bir büyük ahır kezâlik dîvânhâneye muttasıl iki tabaka ulvî odalar olup tabaka-i ûlâsında üç bâb odalar ve iki kenîf ve tabaka-i sâniyesinde kezâlik üç bâb oda ve iki kenîf ve altlarında bir kîlâr ve bir ahır mebnî olup ve arsa-i merkūme üzerinde ayn-ı câriye olduğunu mevlânâ-yı mezbûr mahallinde tahrîr ba‘dehû gelip mahfil-i kazâda vukū‘u üzere ihbâr ve takrîr etmeğin mâ-hüve’l-vâkı‘ gıbbe’t-taleb ketb ve yed-i tâlibe def‘ olundu. Tahrîren fî-evâili Cemâziyelûlâ li-sene semân ve selâsîn ve elf. Şühûdü’l-hâl: Fahrü’l-akrân Yusuf Ağa b. Hasan el-müteferrika, fahrü ashâbi’t-tahrîr ve’l-kalem Hasan Efendi el-kâtib, Mehmed Bey b. Mehmed el-bevvâb, Mustafa Bey b. Abdullah el-cündî, Mustafa Bey b. Mehmed el-bevvâb, Yusuf Ağa b. ( ) el-bevvâbü’s-sultânî, İbrahim Bey b. ( ) el-bevvâb, Ali Bey b. Abdullah el-bevvâb, Hasan Çelebi b. Halil el-mi‘mâr, İbrahim b. Abdullah ve gayruhüm mine’l-hâzırîn.