Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 593 Hüküm no: 535 Orijinal metin no: [174a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Efendi b. Mehmed Efendi tarafından vakfedilmiş olan evin kiracısı Ahmed Efendi’nin evin bahçesini hanımı Saliha Hatun bt. Hasan’a devretmesi Mahmiye-i İstanbul’da Yarhisar mahallesi sâkinlerinden iken vefât eden Hüseyin Efendi b. Mehmed Efendi nâm çelebi sâhib-i hayrın evkāfından olup Havâss-ı Aliyye kazâsına tâbi‘ Hasköy’de vâki‘ bir tarafdan Ahmed Efendi b. Abdullah mülkü ve bir tarafdan Ebubekir b. Ali mülkü ve bir tarafdan Defterdârzâde mülkü ve bir tarafdan tarîk-i âm ile mahdûd bir fevkānî oda ve bir hücre ve sofa ve bi’r-i mâ ve cüneyneyi müştemil menzil mürûr-ı eyyâm ile harâbe ve sütûhu sâkıt olup cânib-i vakf-ı mezbûrda ta‘mîre müsâ‘ade olmadığı şer‘an sâbit ve müte‘ayyin oldukdan sonra menzil-i mezbûru icâre-i mu‘accele ve müeccele ile mutasarrıf olan Ahmed Efendi meclis-i şer‘de halîlesi olan râfi‘atü’l-kitâb Saliha Hatun bt. Hasan mahzarında vakf-ı mezbûrun mütevellîsi olan İsmail Efendi nâm kimesne hâzır olduğu hâlde ikrâr edip menzil-i mezbûru hîn-i tefevvüzünde cânib-i vakfa def‘ u teslîm eylediğim on bin akçe mu‘acceleyi mezbûre Saliha Hatun bana teslîm etmekle ben dahi menzil-i mezbûrun hakk-ı tasarrufunu mezbûr Saliha Hatun’a işbu meclisde hâzır olan mütevellî-i mezbûr felânın izniyle tefvîz edip mezbûre dahi tefevvüz ve kabûl ettikden sonra vakf-ı mezbûrun mütevellîsi olan mezbûr İsmail menzil-i mezbûru müceddeden binâya cânib-i vakıfda müsâ‘ade olmayıp arsasına mukāta‘a takdîr olunmak vakfa enfa‘ olmağı ba‘de’l-keşf ve’t-tahmîni’s-sahîh menzil-i mezbûrun nıkzı beş bin akçeye mezbûre Saliha Hatun’a bey‘ ve semeni olan meblağ-ı mezbûr beş bin akçeyi vakıf için yedinden ahz ettiğimden sonra arsa-i mezbûre tasarrufunu senede yüz yirmi akçe mukāta‘a ile mezbûre Saliha Hatun’a tefvîz edip mezbûre dahi tefevvüz ve kabûl ve arsa-i mezbûrenin üzerine mülk olmak üzere kendi mâlıyla müceddeden binâya izin verdim dedikde mâ-vaka‘a bi’t-taleb ketb olundu. Tahrîren fî-evâsıtı şehri Muharremi’l-harâm li-sene seb‘a ve selâsîn ve elf. Şühûdü’l-hâl: Osman Çelebi b. Mehmed el-bevvâb, Mustafa Çelebi b. Mehmed, Abdülhalim Çelebi b. Mehmed, Hasan b. Veli, Ali Bey b. Abdullah ve gayruhüm. El-emru kemâ hurrire fîhî harrerehü’l-fakīr ileyhi subhânehû Hasan b. Abdünnebî en-Nâib-i Müfettiş-i Haremeyn-i Şerîfeyn -ufiye anhümâ-