Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 596 Hüküm no: 538 Orijinal metin no: [174b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çerkes Yusuf Ağa b. Abdülmennan’ın kiracısı olduğu vakıf evi kendi parasıyla tamir ettirmesi Mahmiye-i İstanbul’da Cezerî Kasım Paşa mahallesinde sâkin fahrü’l-akrân Çerkes Yusuf Ağa b. Abdülmennan meclis-i şer‘-i şerîf-i enverde takrîr-i kelâm edip Haremeyn-i Şerîfeyn Vakfı’ndan olup mahalle-i mezbûrede vâki‘ hudûd [ve] müştemilâtı lede’l-cîrân ma‘lûm olup icâre-i mu‘accele ve müeccele ile mutasarrıf olduğum menzil mürûr-ı eyyâm ile harâba müşrif olup kābil-i süknâ olmamağın izn-i mütevellî ve kendi mâlım ile icâre-i mu‘acceleme mahsûb olmak üzere dâhiliyye ve hâriciyyesinde üç bâb fevkānî oda ve sofa binâ etmişimdir, cânib-i şer‘den üzerine varılıp harc u sarf ettiğim meblağın mertebe-i tahammülü tahmîn ve takvîm olunması matlûbumdur dedikde savb-ı şer‘den Mevlânâ Ali Efendi irsâl olunup ol dahi hâssa mi‘mârlardan Üstâd Ali Çelebi b. Halil ve zeyl-i kitâbda isimleri mastûr olup ebniye ve sukūfa vukūfu olan Müslimîn ile üzerine varıp mu‘âyene ve vakf-ı mezbûra bi’l-fi‘il mütevellî olan zahrü’l-akrân İsmail Çelebi b. Mehmed mahzarında mesâha eylediklerinde hesâb-ı şatrancî üzere dâhiliyye ve hâriciyyede iki yüz altmış bir buçuk döşemenin her zirâ‘ı altmışar akçeden on beş bin altı yüz doksan akçe ve iki yüz seksen zirâ‘ sakfın her zirâ‘ı altmışar akçeden on altı bin sekiz yüz altmış akçe ve iki yüz kırk beş zirâ‘ dolma duvarın her zirâ‘ı otuzar akçeden yedi bin üç yüz elli akçe ve bi-hesâb-ı mezbûr yüz kırk altı buçuk zirâ‘ tavanın her zirâ‘ı kırkar akçeden beş bin sekiz yüz altmış akçe ve kilidli ve kafesli üç masandra yedi bin beş yüz akçe ve beş munakkaş dolap bin beş yüz akçe ve beş demirli pencere iki bin beş yüz akçe ve üç düz cam yedi yüz elli akçe ve bi-hesâb-ı mezbûr seksen zirâ‘ atîk duvara kireç sıvanın her zirâ‘ı onar akçeden sekiz yüz akçe ve on iki kıt‘a kebîr kürsü ve direk yüz yetmişer akçeden bin dokuz yüz yirmi akçe ve dört kıt‘a billûr cam bin altı yüz akçe ve iki ocak bin iki yüz akçe ve üç kapı bin akçe ve bir kenîf ve kîlâr ve nerdübân bin akçe ki cem‘an altmış beş bin beş yüz otuz akçeye tahammülü vardır, noksân ile binâ mümkün değildir deyu mi‘mâr-ı mezbûr ve sâir ehl-i vukūf bi’l-ittifâk haber verdiklerinde mevlânâ-yı mezbûr mahallinde tahrîr ve ba‘dehû gelip meclis-i şer‘de takrîr etmeğin mâ-hüve’l-vâkı‘ gıbbe’t-taleb ketb olundu. Tahrîren fî-evâili Muharremi’l-harâm li-sene tis‘a ve selâsîn ve elf. Şühûdü’l-hâl: Mefharü’l-kuzât es-Seyyid Mustafa Efendi b. es-Seyyid Hüseyin el-Kādî bi-Taraklıbor, Dilaver Bey b. Abdullah el-bevvâb, Osman Bey b. Sırrı, Mustafa b. Pirce, Mehmed Bey b. Abdullah.