Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 597 Hüküm no: 539 Orijinal metin no: [175a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmihan bt. Cafer’in kiracısı olduğu Haremeyn Vakfı’na ait yanan vakıf evi kendi parasıyla yeniden yaptırması Mahmiye-i İstanbul’da Sarı Bayezid mahallesinde sâkine İsmihan bt. Ca‘fer nâm hatun meclis-i şer‘-i şerîf-i enverde takrîr-i kelâm edip Haremeyn-i Şerîfeyn Vakfı’ndan olup icâre-i mu‘accele ve müeccele ile mutasarrıfe olduğum mahalle-i mezbûrede vâki‘ lede’l-ahâlî ve’l-cîrân ma‘lûmü’l-hudûd menzil bi’l-külliye muhterik olup müceddeden binâya muhtâc olup cânib-i vakıfdan müceddeden binâya müsâ‘ade olmamağın ma‘rifet-i mütevellî ile icâre-i mu‘acceleme mahsûb olmak üzere kendi mâlım ile müceddeden binâ etmişimdir, cânib-i şer‘den üzerine varılıp harc u sarf ettiğim meblağın mertebe-i tahammülü tahmîn ve takvîm olunması matlûbumdur dedikde savb-ı şer‘den Mevlânâ Ali Efendi irsâl olunup ol dahi hâssa mi‘mârlardan Üstâd Ali Çelebi b. Halil ve zeyl-i sütûrda isimleri mastûr olan Müslimîn ile üzerine varıp mu‘âyene ve mesâha eylediklerinde bennâ zirâ‘ıyla tûlen yirmi dört ve arzen bir tarafdan on altı ve bir tarafdan sekiz bi-hesâb-ı şatrancî iki yüz sekiz zirâ‘ arsa üzerine mebnî menzilin hesâb-ı merkūm üzere üç yüz on altı zirâ‘ taş duvarının her zirâ‘ı ellişer akçeden on beş bin altı yüz akçe ve bi-hesâb-ı merkūm yüz doksan beş zirâ‘ döşemenin her zirâ‘ı ellişer akçeden dokuz bin yedi yüz elli akçe ve bi-hesâb-ı merkūm üç yüz altmış altı zirâ‘ dolma duvarın her zirâ‘ı yirmi beşer akçeden dokuz bin elli akçe ve on bir kıt‘a düz camın her biri yüz ellişer akçeden bin altı yüz elli akçe ve yedi kıt‘a demirli pencerenin herbiri dörder yüz akçeden iki bin sekiz yüz akçe ve altı kıt‘a parmaklı pencerenin herbiri yüz yirmişer akçeden yedi yüz yirmi akçe ve sekiz kıt‘a dolabın herbiri yüz yirmişer akçeden dokuz yüz altmış akçe ve bi-hesâb-ı merkūm yüz doksan beş zirâ‘ tavanın her zirâ‘ı otuz beşer akçeden altı bin yedi yüz yirmi beş akçe ve üç masandra bin akçeden üç bin akçe üç ocak bin sekiz yüz akçe ve bi-hesâb-ı merkūm üç yüz altı zirâ‘ sakfın her zirâ‘ı ellişer akçeden on beş bin üç yüz akçe ve bir kenîf altı yüz akçe ve dört kapı bin iki yüz akçe ve bir nerdübân beş yüz akçe ki cem‘an altmış dokuz bin yedi yüz elli beş akçe[ye] tahammülü olup muhterik olan menzilin ber-vech-i tahmîn on bin akçe nıkzını ihrâcdan sonra elli dokuz bin yedi yüz elli beş akçe bâkī kaldığını mi‘mâr-ı mezbûr ve sâir ehl-i vukūf bi’l-ittifâk haber verdiklerinde mevlânâ-yı mezbûr mahallinde tahrîr ba‘dehû gelip meclis-i şer‘de inhâ ve takrîr etmeğin mâ-hüve’l-vâkı‘ gıbbe’t-taleb ketb olundu. Tahrîren fî-evâsıtı Muharremi’l-harâm li-sene tis‘a ve selâsîn ba‘de’l-elf. Şühûdü’l-hâl: Sefer Beşe b. Süleyman Serdâr, el-Hâc Mustafa b. Abdullah, Ali Bey b. Abdullah el-bevvâb, Hasan Bey b. Abdullah, Yusuf b. Ali Serdâr, el-Hâc Bayram b. Abdurrahman.