Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 107 Hüküm no: 29 Orijinal metin no: [4b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Çelebi b. Mustafa’nın, arsasını Marko v. Marat’a sattığı Mahmiye-i İstanbul’da Çerâğī Hasan mahallesinde sâkin Ahmed Çelebi b. Mustafa nâm kimesne mahfil-i kazâda işbu bâ‘isü’s-sifr Marko v. Marat nâm zimmî muvâcehesinde ikrâr ve takrîr-i kelâm edip mahalle-i mezbûrede vâki‘ bir tarafı kendi mülküm ve bir tarafı Hani nâm nasrâniye mülkü ve bir tarafı Marko nâm zimmî mülkü ve bir tarafı Medîne-i Münevvere [vakfı] mülkü ile mahdûd olan tûlen on bir zirâ‘ ve arzen altı zirâ‘ bi hesâb-ı şatrancî altmış sekiz zirâ‘ mülk arsa-i hâliyemi mezbûr Marko’ya seksen esedî guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ol dahi iştirâ ve kabûl eyledikden sonra semeni olan meblağ-ı mezbûr seksen esedî guruşu merkūm Marko yedinden tamâmen ahz u kabz eyledim, ba‘de’l-yevm zikr olunan arsa-i hâliye mezbûr Marko’nun mülk-i müşterâsıdır keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sânî ve’l-ışrîn min şehri Rebî‘ilâhir li sene seb‘a ve seb‘în ve elf. Şuhûdü’l-hâl: Ali Çelebi b. Abdullah, Mehmed Çelebi el-Müezzin, es-Seyyid Halil Efendi b. es-Seyyid Mehmed, Ömer Çelebi Kemhacı, Hüseyin b. Abdülgaffâr, Mustafa b. Ali.