Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 107 Hüküm no: 30 Orijinal metin no: [4b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma Hatun bt. Abdullah’ın, câriyesini vasiyet yoluyla âzat ettiği Mahmiye-i İstanbul mahallâtından Kalenderhâne mahallesi sâkinelerinden Fâtıma Hâtun bt. Abdullah tarafından tedbîr-i âti’l-beyânı ikrâra vekîl olduğu zâtını ma‘rifet-i şer‘iyye ile ârifân mahalle-i mezbûre imâmı Mahmud Efendi b. Mustafa ve müezzin İlyas Halîfe b. Mehmed nâm kimesneler şehâdetleriyle şer‘an sâbit olan Mehmed Beşe b. Ali nâm kimesne meclis-i şer‘-i şerîf-i lâzımü’t-teşrîfde ikrâr ve takrîr-i kelâm edip müvekkile-i mezbûre kendiye rıkkıyyetini mu‘terife olan işbu bâ‘isetü’l-kitâb açık kaşlı, sarı elâ gözlü, orta boylu Rûsiyyetü’l-asl Şahbaz bt. Abdullah nâm câriye-i memlûkesini tedbîr-i mutlak ile müdebbere edip bi irâdetillâh-i te‘âlâ kazâ-i nahb eylediğimde mevsûfe-i mezbûre Şahbaz sâir harâir-i asliyyât gibi hürre olsun dedi dedikde mâ hüve’l-vâki‘ bi’l-ibtigā ketb olundu. Fi’l-yevmi’l-ışrîn min Rebî‘ilâhir sene 1077. Şuhûdü’l-hâl: Abbas Efendi b. İbrahim el-İmâm, Hasan Bey b. Abdullah, Mehmed Çelebi b. İlyas, Mahmud Çelebi b. Osman, Şükrullah Bey b. Mustafa, Abdi Çelebi b. Hüseyin.