Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 623 Hüküm no: 567 Orijinal metin no: [182a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haremeyn Evkafı mütevellisi İsmail Çelebi’nin Çukadar Ali Bey tarafından vakfedilen evi teslim alması Mahrûsa-i İstanbul’da vâki‘ Haremeyn-i Şerîfeyn Evkāfı’na bi’l-fi‘il mütevellî olan fahrü’l-akrân İsmail Çelebi b. Mehmed meclis-i şer‘-i şerîf-i lâzımü’t-teşrîfde takrîr-i kelâm edip mahrûsa-i Üsküdar’da Karakadı mahallesinde sâkin iken vefât eden merhûm Çukadâr Ali Bey hâl-i sıhhatinde mahalle-i mezbûrede vâki‘ bir tarafı yine kendi vakfı ile ve bir tarafı vakıf menzil ile ve bir tarafı Tenbel Mescidi imâmına meşrût olan menzil ile ve taraf-ı âharı tarîk-i âm ile mahdûd olan menzilini vakf edip süknâsını evvelâ nefsine ba‘dehû karındaşı oğlu Ahmed Çelebi b. Derviş Bey’e ba‘dehû Haremeyn-i Şerîfeyn fukarâsına şart edip hâlâ meşrûtün-aleyhâ olanlardan ferd kalmamağla menzil-i merkūm cânib-i vakf-ı şerîfe âid olmuşdur, savb-ı şer‘den üzerine varılıp arsası mesâha ve müştemilâtı tahrîr olunmak matlûbumdur deyicek, kıbel-i şer‘-i şerîfden Mevlânâ Ali Efendi irsâl olunup ol dahi mi‘mârân-ı hâssadan Hasan Çelebi b. Hüseyin nâm mi‘mâr ve zeyl-i kitâbda mastûrü’l-esâmî olan Müslimîn ile menzil-i mezbûre üzerine varıp mu‘âyene ettiklerinde bennâ zirâ‘ı ile tûlen on beş buçuk ve arzen sekiz zirâ‘ bi-hesâb-ı şatrancî yüz yirmi dört zirâ‘ arsa üzerinde mebnî iki bâb beyt-i ulvî ve iki bâb beyt-i süflî ve bir sofa ve bir harâba müşrif ahırı ve kenîfi müştemil olduğunu mevlânâ-yı mezbûr mahallinde tahrîr edip ba‘dehû meclis-i şer‘de gelip inhâ ve takrîr ettikden sonra mâ-hüve’l-vâkı‘ ketb olundu. Fî-evâsıtı Cemâziyelâhir li-sene tis‘a ve selâsîn ve elf. Şühûdü’l-hâl: Fahrü’l-müderrisîn İbrahim Efendi el-kassâm, es-Seyyid Fazlullah Efendi b. es-Seyyid Mehmed el-imâm, Yusuf Ağa b. Abdülmennan, İsmail Çelebi b. Mehmed el-bevvâb, Derviş Çelebi b. Hüseyin, Ali b. Yahya, Mehmed b. Veli ve gayruhüm.