Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 622 Hüküm no: 566 Orijinal metin no: [181b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sinan Beşe b. Abdullah’ın tasarrufundaki Haremeyn Evkafı’na ait değirmeni tamir ettirmesi Havâss-ı Kostantıniyye nevâhîsinden Küçük Çekmece’ye tâbi‘ Dereköy karye sâkinlerinden Sinan Beşe b. Abdullah nâm râcil meclis-i şer‘-i şerîf-i enverde takrîr-i kelâm edip Haremeyn-i Şerîfeyn Evkāfı’ndan olup karye-i mezbûre sınırı dâhilinde vâki‘ icâre-i mu‘accele ve müeccele ile mutasarrıf olduğum lede’l-cîrân ma‘lûmü’l-hudûd iki göz değirmenin mürûr-ı eyyâm ile olukları ve taşları ve hânesinin sakf ve döşemesi tecdîde ve suyolu ve zikr olunan değirmen kurbünde vâki‘ bir kıt‘a bostanın hendekleri tahliyyeye muhtâc olmağın bundan akdem izn-i şer‘ ve ma‘rifet-i mütevellî ve icâre-i mu‘acceleme mahsûb olmak üzere kendi mâlım ile müceddeden binâ ve suyolu harklarını tahliyye etmişimdir, cânib-i şer‘den üzerine varılıp harc [u] sarf ettiğim meblağın mertebe-i tahammülü tahmîn ve takvîm olunması matlûbumdur dedikde savb-ı şer‘den Mevlânâ Ali Efendi irsâl olunup ol dahi hâssa mi‘mârlardan Üstâd Ali Çelebi b. Halil ve zeyl-i kitâbda isimleri mastûr olan Müslimîn ile üzerine varıp mu‘âyene ve mesâha eylediklerinde zikr olunan değirmenin dört kıt‘a taşının [182a] herbir kıt‘ası ikişer bin dokuz yüz ellişer akçeden on bir bin sekiz yüz akçe ve iki kıt‘a mükemmel çarhın herbiri bin beşer yüz akçeden üç bin akçe ve bir kebîr oluk iki bin akçe ve suyolu ve bostan hendeki tahliyyesine ve kireç ve taş ve lökün ve künk ber-vech-i maktû‘ üç bin beş yüz akçe ve hâne ve döşemesine taban ve miyâne ve üstâdiyye ve ırgadiyesiyle bin beş yüz akçe ve sakfına mertek ve kiremid ve padavra ve üstâdiyye ve ırgadiyesiyle üç bin iki yüz akçe ki cem‘an yirmi beş bin akçeye tahammülü vardır, noksân ile binâ mümkün değildir deyu mi‘mâr-ı mezbûr ve sâir ehl-i vukūf bi’l-ittifâk haber verdiklerini mevlânâ-yı mezbûr mahallinde tahrîr ba‘dehû gelip meclis-i şer‘de inhâ ve takrîr etmeğin mâ-hüve’l-vâkı‘ bi’t-taleb ketb olundu. Fî-evâili şehri Recebi’l-mürecceb min-şühûri sene tis‘a ve selâsîn ve elf. Şühûdü’l-hâl: Mustafa Çelebi b. Hüsam el-mi‘mâr, Ali Bey b. Abdullah el-mi‘mâr, Hızır b. Abdullah el-mi‘mâr, Ali b. Abdullah el-mi‘mâr, Hüsrev Bey b. Abdullah el-mi‘mâr.