Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 629 Hüküm no: 575 Orijinal metin no: [184a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haremeyn Evkafı reayasının vergi teklifiyle rahatsız edilmemelerini emreden ferman sureti Bu hatt-ı hümâyûndur. Bu emr-i şerîfimle âmil olup dahi tedâhül nâmıyla dahl olunmaya. Tuğrâ-yı şerîf yeridir. Emîrü’l-ümerâi’l-kirâm kebîrü’l-küberâi’l-fihâm zü’l-kadri ve’l-ihtirâm sâhibü’l-izzi ve’l-ihtişâm el-muhtassu bi-mezîdi inâyeti’l-meliki’l-a‘lâ Rum beylerbeyisi -dâme ikbâlühû- ve mefâhirü’l-kuzât ve’l-hükkâm me‘âdinü’l-fezâil ve’l-kelâm Kilmigad ve Zile ve Haremeyn-i Şerîfeyn Evkāfı olan kadılar -zîde fazluhum- tevkī‘-i refî‘-i hümâyûn vâsıl olucak ma‘lûm ola ki, Dârüssaâdem ağası olan iftihârü’l-havâs ve’l-mukarrebîn Hacı Mustafa Ağa tarafından mukaddemâ Dersaâdet’ime şöyle arz olundu ki bi’l-fi‘il nâzırı olduğu Haremeynü’ş-şerîfeyn Evkāfı re‘âyâsı min-külli’l-vücûh mefrûzü’l-kalem ve maktû‘ü’l-kadem serbest olduğundan gayrı avârız-ı dîvâniyye ve tekâlîf-i örfiyyeden mu‘âf ve müsellem olup hâricden dahl olunagelmiş değil iken hâlâ beylerbeyi ve sancakbeyleri ve kethüdâları ve sâir ehl-i örf nâmına olanlar mücerred celb ve ahz için hilâf-ı şer‘ ve kanun ve mugāyir-i emr-i hümâyûn fukarâsının üzerlerine ziyâde âdemler ile gelip ehl ü ıyâl ile sâkin oldukları evlerinin üzerlerine konup müft ü meccânen yem ve yiyecek ve arpa ve saman ve koyun ve kuzu ve tavuk ve küçük ve selâmlık ve na‘l bahâ nâmıyla salgunlar ve tekâlîfler teklîf edip fukarâyı rencîde etmekle evkāf-ı mezbûrenin ekser re‘âyâsı dağılıp mahsûl-i vakfa zarar müretteb olmuşdur, evkāf-ı mezbûre re‘âyâsı üslûb-ı sâbık üzere avârız-ı dîvâniyye ve tekâlîf-i örfiyyeden mu‘âf ve müsellem olup min-ba‘d beylerbeyi ve sancakbeyi ve âdemleri ve subaşıları ve sâir ehl-i örf tâifesi hilâf-ı mu‘âfnâme-i hümâyûn te‘addî ve tecâvüz ettirilmemek bâbında emr-i şerîfim verilip ve Mâliye tarafından dahi müte‘addid evâmir-i şerîfe vârid olmağla Dîvân-ı Hümâyûn tarafından mukaddemâ emr-i şerîf verilip imdi Haremeyn-i Şerîfeyn Evkāfı min-külli’l-vücûh serbest ve cemî‘-i tekâlîfden ve avârız-ı dîvâniyyeden mu‘âf ve müsellem oldukları mukarrerdir, mukaddemâ ellerinde olan evâmir-i şerîfe mûcebince men‘ u def‘ olunmak bâbında emr-i şerîfim taleb eylemeğin husûs-ı mezkûra mukayyed olup göresin, mukaddemâ verilen emr-i şerîfim mûcebince bunları hilâf-ı şer‘ ve kanun beylerbeyi ve sancakbeyi [ve] voyvodalarına ve sâir ehl-i örf tâifesine rencîde ve remîde ettirmeyesin, hilâf-ı şer‘ ve kanun ve mugāyir-i emr-i hümâyûn kimesneye iş ettirmeyesiz, şöyle ki ba‘de’t-tenbîh eslemeyip tekrâr fukarâyı tekâlîf ile rencîde ederler ise vukū‘u üzere yazıp bildiresiz deyu mukaddemâ emr-i şerîf verilip bu âna değin tecdîd eylemediklerin bildirip tecdîdin ricâ eylemeğin buyurdum ki bu bâbda mukaddemâ ma‘hûd-ı mesfûr üzere verilen emr-i şerîfim mûcebince amel edip hilâfına cevâz göstermeyesiz, şöyle bilesiz, alâmet-i şerîfe i‘timâd kılasız. Tahrîren fi’l-yevmi’s-sâmin [min] şehri Zilka‘deti’ş-şerîfe li-sene erba‘a ve selâsîn ve elf. Be-makām-ı Kostantıniyye.