Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 629 Hüküm no: 574 Orijinal metin no: [183b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haremeyn Evkafı’na intikal eden evin İhsan bt. Ali’ye kiraya verilmesi Budur ki, Dârü’l-hilâfeti’l-aliyye’de vâki‘ Haremeyn-i Şerîfeyn Evkāfı’na mütevellî olan fahrü’l-emâsil ve’l-ekârim İsmail Ağa meclis-i şer‘-i şerîf-i lâzımü’t-tevkīrde hâfızetü hâze’l-kitâb İhsan bt. Ali nâm hatun muvâcehesinde ikrâr-ı tâm ve takrîr-i kelâm edip mahallât-ı mahmiye-i mezbûreden Kızılminare mahallesinde vâki‘ bir tarafı Hasan Çavuş mülkü ile ve bir tarafı Malkoç Ağa mülkü ile ve taraf-ı âharı mahalle-i mezbûre müezzinine meşrût olan menzil ile mahdûd olup tûlen ve arzen bi-hesâb-ı şatrancî beş yüz otuz dört zirâ‘ arsa üzerinde mebnî iki bâb beyt-i süflî ve ahşâb ile mebnî bir hücre ve bi’r-i mâ ve sofa ve kenîf ve muhavvatayı müştemil olan menzilin sâhibesi ( ) hâl-i sıhhatinde evvelâ kendüye ba‘dehâ mu‘takasından Cemile bt. Abdülmennan nâm Hatuna ba‘dehâ Medîne-i Münevvere fukarâsına şart ve ta‘yîn ettiği vakfiyesinde mastûr olmağın hâlen mezbûre Cemile Hatun vefât edip meşrûtün-aleyhâ kimesne kalmayıp menzil-i merkūm vakfa âid olmağın beyne’t-tâlibîn müzâyede olundukda mezbûre İhsan Hatun üzerinde sekiz bin akçe icâre-i mu‘accele ve beher şehr otuz akçe ücret-i müeccele ile karâr edip ziyâde ile tâlib-i âhar zuhûr etmemeğin ben dahi vech-i merkūm üzere menzil-i merkūmu mezbûre İhsan Hatun’a îcâr ettim, ol dahi istîcâr ve kabûl ettikden sonra icâre-i mu‘accelesi olan sekiz bin akçeyi yedinden bi’t-tamâm ahz u kabz ettim dedikde gıbbe’t-tasdîk vicâhen mâ-hüve’l-vâkı‘ bi’t-taleb ketb olundu. Şühûdü’l-hâl: Abdülhalim Çelebi el-müderris, Abdullah Çelebi el-mülâzım, Hasan Çelebi b. Hüseyin el-mi‘mâr, Ali Çelebi b. ( ), Ali Bey el-bevvâb.