Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 635 Hüküm no: 582 Orijinal metin no: [185b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vakfedenin şartı gereği azatlılarına intikal etmiş olup onların oturmadığı evlerin vakıf tarafından kiraya verilmesi A‘lemü’l-ulemâi’l-mütebahhirîn efdalü’l-fudalâi’l-müteverri‘în yenbû‘ü’l-fazli ve’l-yakīn keşşâfü’l-müşkilâti’d-dîniyye hallâlü’l-mu‘dılâti’l-yakīniyye miftâhü’l-künûzi’l-hakāyik misbâhü rumûzi’d-dekāyik el-mahfûfu bi-sunûfi avâtıfi’l-meliki’l-mu‘în sâbıkā Anadolu kādıaskeri olup hâlâ Galata kādısı olan Mevlânâ Kemaleddin -edâmallâhü te‘âlâ fezâilehû- ve akzâ kuzâti’l-Müslimîn evlâ vülâti’l-muvahhidîn yenâbi‘ü’l-fazli ve’l-yakīn hüccetü’l-hakkı ale’l-halkı ecma‘în vârisûnü’l-ulûmi’l-enbiyâi ve’l-mürselîn el-mahsûsu bi-mezîdi inâyeti’l-meliki’l-mu‘în İstanbul ve Üsküdar ve Haslar kādıları -zîdet fezâiluhum- tevkī‘-i refî‘-i hümâyûn vâsıl olucak ma‘lûm ola ki, Haremeyn-i Şerîfeyn mütevellîsi südde-i saâdetime arzuhâl sunup taht-ı kazânızda bazı kimesneler evlerin kendülere ve evlâdına ba‘dehû utekāya ve utekādan sonra Medîne-i Münevvere’ye vakf etmekle hâlâ utekāya intikāl eylemiş bazı evlerin içinde şart-ı vâkıf mûcebince utekā sâkin olmayıp âhar diyârlarda mütemekkin olmağla evleri kirâya verdikleri ecilden zikr olunan evler ta‘mîr ve termîm olunmayıp harâbe olmağın anın gibi utekā olanlar geldiklerinde sâkin olmak üzere hâlâ Haremeyn cânibinden kirâya verilip hâsıl olan kirâ akçesiyle ta‘mîr olunmak bâbında emr-i şerîfim verilmek ricâsına i‘lâm etmeğin buyurdum ki Dergâh-ı Âlî bevvâblarından Haremeyn-i Şerîfeyn mütevellîsi el-Hâc Hasan vusûl buldukda herbiriniz bu husûsda mukayyed olup taht-ı kazânızda vech-i meşrûh üzere evlâda ve utekāya intikāl eylemiş evlerin içinde şart-ı vâkıf muktezâsınca utekā sâkin olmayıp âhar diyârlarda mütemekkin olmağla kirâya verdikleri evleri mezkûr mütevellîye utekā gelip kendileri sâkin oluncaya değin zabt ve kirâ akçeleriyle ta‘mîr ve termîm ettirdip bir ferde ta‘allül ve inâd ettirmeyesiz, şöyle bilesiz, alâmet-i şerîfe i‘timâd kılasız. Tahrîren fî-evâsıtı şehri Cemâziyelâhire sene semân aşere ve elf. Be-makām-ı Kostantıniyye el-mahrûsa.