Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 634 Hüküm no: 581 Orijinal metin no: [185a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Aynişah Hatun’un Mektebi vakfına ait paranın yeni rayiç üzere hesaplanması Fî-zemeni umdeti’l-müderrisîni’l-kirâm Ahmed b. Resul el-Me’mûr bi-teftîşi’l-evkāf. Târîh-i kitâb şehrinin beşinci günü fermân-ı cihân-mutâ‘ ile kesik zuyûf akçenin te‘âtîsi memnû‘ ve altın yüz yirmiden ve guruş seksener akçeden ziyâdeye râyic olması merfû‘ olmağla mahrûsa-i İstanbul’da Hayreddin Bey mahallesinde vâki‘ merhûme Aynişah Hatun’un Mektebi vakfına bi’l-fi‘il mütevellî olan işbu bâ‘isü’l-kitâb el-Hâc Şuayb Çelebi b. İbrahim nâm kimesne mahfil-i kazâda takrîr-i kelâm edip hâlâ mütevellîsi olduğum vakfın icârâtından olup târîh-i kitâb Muharremi evâilinde müste’cirînden onar akçeye râyic iken ahz u kabz etmekle hâlâ yedimde mevcûd olan altı yüz seksen Osmânî’nin ber-mûceb-i fermân-ı âlî râyic olduğu üzere kesri tahrîr olunması matlûbumdur deyu zikr olunan altı yüz seksen Osmânî’yi meclis-i şer‘a ihzâr edip müşâhede olundukda fi’l-vâki‘ zikri sebk eden Osmânî vech-i muharrer üzere icâre-i mezbûreden hâsıl olup hîle ve hud‘a ve âhardan halt etmediği hüddâm-ı vakfın sikātı haberinden mâ‘adâ half billâhi etmekle mütehakkık olmağın hâlâ râyic olduğu üzere cümlesi iki bin kırk akçe ve hesâb-ı mesfûr üzere kesri dört yüz altmış akçe olduğu mukarrer olmağın mâ-vaka‘a bi’t-taleb hıfzan li’l-mekāl ketb olundu. Hurrire fi’l-yevmi’s-sâmin min-şehri Saferi’l-hayr li-sene erba‘a ve selâsîn ve elf. Şühûdü’l-hâl: Muslihiddin Efendi b. İbrahim, Halil Efendi b. Mahmud, el-Hâc Hürrem b. Abdullah, Ömer Halîfe b. Osman, Mehmed Halîfe b. Muslihiddin, Mustafa Bey el-bevvâb.