Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 636 Hüküm no: 584 Orijinal metin no: [185b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Raziye Hatun bt. Ali’nin terekesinden olan evin mülkiyet iddiasıyla el koyan Behram b. Murad’dan geri alınması Mahmiye-i İstanbul’da Seydi Halîfe mahallesinde sâkine iken bundan akdem vefât eden merhûme Râziye Hatun bt. Ali’nin tenfîz-i vasâyâsına kıbel-i şer‘den mansûb vasî olan bâ‘isü’l-kitâb İsmail Halîfe b. Ali nâm cündî meclis-i şer‘de menzil-i âti’l-beyâna mülkiyyet zu‘mu ile vâzı‘ü’l-yed olan Behram b. Murad mahzarında bi’l-vesâye takrîr-i da‘vâ edip merkūme Râziye Hatun hâl-i sıhhatinde nükūd ve terekesinden yüz bin akçe tamâmına varınca sülüs-i mâlı vücûh-ı hayrâta sarf etmeği vasiyyet edip mahalle-i merkūme[de] vâki‘ sâkin olduğu menzil ki bir tarafı Kaytas Çavuş mülkü ve bir tarafı Mahmud Ağa mülkü ve bir tarafı Mehmed Çelebi mülkü ve bir tarafı tarîk-i âm ile mahdûddur, bey‘ olunup semeni sülüs-i mâla zam olunup menzil-i mahdûd-ı mezkûr akçesiyle sülüs-i mâl yüz bin akçe olmağı ta‘ayyün eylemişdir ve bu husûsa vasiyyetnâme tahrîr ettirip mazmûnuna hâzırân bi’l-meclis olan Hasan Çavuş [b.] İbrahim ve Muslı Çelebi b. el-Hâc Faik nâm kimesneleri işhâd etmeğin menzil-i merkūm semen-i misli ile bey‘ olunup akçesi vasiyyeti üzere vücûh-ı hayrâta sarf olunmak lâzım iken merkūm Behram bi-gayrı vech-i şer‘î vaz‘-ı yed edip tasarruf eder, suâl olunup ref‘-i yedine tenbîh olunmak matlûbumdur dedikde gıbbe’s-suâl merkūm Behram cevâbında tafsîl-i mezkûr üzere vasiyyeti münkir olmağın vasiyy-i mezkûr İsmail Halîfe’den müdde‘âsını mübeyyin beyyine taleb olundukda merkūmân Hasan Çavuş ve Muslı Çavuş istişhâd olunduklarında fi’l-hakīka merkūme Raziye seb‘a aşere ve elf senesi Şevvâli âhirinde vücûh-ı hayrâta sarf olunmak için sülüs-i mâl yüz bin akçe vasiyyet edip ve menzil-i mahdûd-ı merkūm bey‘ olunup semeni vech-i sâbık üzere sülüs-i merkūma zam olunmağı ta‘ayyün etmişdir, bu husûsa şâhidleriz, şehâdet dahi ederiz deyu edâ-i şehâdet eylediklerinde ba‘de’t-ta‘dîl ve’t-tezkiyye şehâdetleri makbûl olmağın mûcebince merkūm Behram’ın menzil-i merkūm[dan] ref‘-i yedine tenbîh birle mâ-vaka‘a bi’t-taleb ketb olundu. Fî-evâili Cemâziyelâhire li-sene ihdâ ve selâsîn ve elf. Şühûdü’l-hâl: Hüseyin Ça[vuş] el-kâtib, es-Seyyid Mehmed Efendi el-kâtib, Hüseyin Bey el-bevvâb, Ali Beşe b. Maksud er-râcil, Mustafa Çelebi el-kâtib, Derviş Mehmed [b.] Mehmed. (Mühür)