Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 41 Hüküm no: 1 Orijinal metin no: [1-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice İclal Hanım’ın vefatıyla çocukları Mehmed Salih ile Şerife Fatma Bedriye’ye intikal eden vakıf evin satışına izin verilmesi el-Hâc Esad, izin: 1 kıt‘a Numara: ( ), 787 guruş Mahmiye-i İstanbul’da Sultan Selim kurbünde Çerâğī Hamza mahallesinde sâkine iken bundan akdem vefât eden Hadice İclal Hanım bt. Mehmed Salih’in sadrî sagīr oğlu Mehmed Salih ve sadriye sagīre kızı Şerife Fatıma Bedriye’nin pederleri ve velîleri olup mahmûdü’l-hâl idiği ihbâr olunan işbu bâ‘isü’l-kitâb asâkir-i bahriye yüzbaşılarından Mehmed Hayri Bey b. İsmail bi’l-velâye takrîr-i kelâm edüp Hazîne-i Haremeyn-i Muhteremeyn’den mazbût evkāfdan kapudan-ı merhûm esbak Sinanpaşa Vakfı müsakkafâtından Fenerkapısı dâhilinde Abdi Subaşı mahallesinde Camcı Çeşmesi sokağında otuz dokuz numara ile murakkam ma‘lûmü’l-hudûd ve’l-müştemilât şehriye on beş akçe icâre-i müeccelelü mukaddemâ arsa el-yevm bir bâb menzil müteveffât-ı mezbûrenin hayatında bâ-sened-i hâkānî taht-ı tasarrufunda olup ba‘de vefâtihâ sagīrân-ı mezbûrâna hasbe’l-âde münâsafeten intikāl edüp lâkin menzil-i mezkûr ânen fe-ânen müşrif-i harâb olarak hâsılı harcına vefâ etmeyip bekāsı sagīrân-ı mezbûrân haklarında muzır ve gayr-ı nâfi‘ olmağla sagīrân-ı mezbûrânın menzil-i mezkûru bedel-i misliyle bâ-re’y-i mütevellî âhara ferâğ ve bedeli ahz ü kabz birle i‘mâl ve istirbâh olunup hâsıl olan nemâsıyla ma‘an hıfz olunmak sagīrân-ı mezbûrân haklarında her vechile hayırlu ve nâfi‘ olduğuna binâen işbu yedimde olup hâlâ kassâm-ı askerî fazîletlü Mehmed Emin Efendi ile İkinci Dâire-i Belediye taraflarından i‘tâ olunan memhûr bir kıt‘a tahmîn-i bedel pusulası mantûkunca sagīrân-ı mezbûrânın menzil-i mezkûru bundan akdem lede’l-müzâyede ve ba‘de’l-keşf el-yevm bedel-i misli idiği ihbâr olunan lira-yı Osmânî yüz guruş hesâbıyla elli iki bin beş yüz guruş mukābelesinde bâ-re’y-i mütevellî âhara ferâğa izin taleb şüd. Fî 5 Şa‘bân sene [1]300 Şühûd ve gayruhum. Derûn-ı hüccetde bast ü beyân olunduğu üzere veliyy-i mûmâ-ileyh Mehmed Hayri Bey sagīrân-ı mezbûrânın menzil-i mezkûrunu bedel-i misli idiği mütehakkık olan lira-yı Osmânî yüz guruş hesâbıyla elli iki bin beş yüz guruş bedel mukābelesinde Muhzır Hasan Ağa b. Abdüllatif’e ol dahi der-akab bedel-i merkūm mukābelesinde veliyy-i mûmâ-ileyhe ba‘de’l-ferâğ veliyy-i mûmâ-ileyh Mehmed Hayri Bey sagīrân-ı mezbûrânın müşterek mallarından ve li-ecli’l-idâne vasî nasb olunan mezbûr Hasan Ağa yedinden istidâne ve kabz ve bilâ-zarûre umûruna sarfla istihlâk eylediği lira-yı Osmânî yüz guruş hesâbıyla elli iki bin beş yüz guruş deyni mukābelesinde menzil-i mezkûru sagīrân-ı mezbûrâna vefâen ferâğ edeceğinden ferâğ-ı mezkûrun icrâ ve senedât-ı lâzımesinin i‘tâsı içün işbu mahalle şerh verildi.