Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 42 Hüküm no: 2 Orijinal metin no: [1-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Kethuda Vakfı mütevellisi İbrahim Hakkı Bey’in Bosna’ya gideceğinden İsmail Efendi’yi vekil bırakması Mehmed Necib, nasb-ı vekîl Numara: 15, 45 guruş Boğaziçi’nde Vaniköyü’nde sâkin İbrahim Hakkı Bey b. Mehmed Nuri m. Sultan Süleyman türbedârı İsmail Efendi b. Hüseyin mahzarında ikrâr ve takrîr-i kelâm edüp Nezâret-i Haremeyn-i Muhteremeyn’e tâbi‘ evkāfdan Galata kazâsına tâbi‘ Ortaköy’de vâki‘ İbrahim Paşa kethudâsı merhûm Mehmed Kethudâ Vakfı’nın ber-vech-i meşrûta tevliyeti Saliha Ülfet Hanım mahlûlünden bana tevcîhi Mahkeme-i Teftîş’den i‘lâm olunup ancak ben bu def‘a li-ecli’l-maslaha Bosna cânibine azîmet edeceğimden vakf-ı mezkûrun bi’l-cümle musakkafât ve müstegallâtından vukū‘ bulan ferâğ ve intikālâtını istimâ‘ ve i‘tâ-i izne ve mahlûlâtını âhara îcâra ve alınan harclardan tevliyete âid hisse ile vâridât-ı vakfı ahz ü kabz ile mesârif ve vezâifini i‘tâya ve sâl be-sâl muhâsebesini bi’r-rü’ye fazlasını bana irsâl ve îsâle ve da‘vâ zuhûrunda terâfu‘ ve husûmete ve husûs-ı mezkûr mütevakkıf olduğu umûrun küllîsine lede’l-hâce tarafından âharı tevkîle mezûn olmak üzere tarafımdan mûmâ-ileyh İsmail Efendi’yi vekâlet-i mutlaka-i sahîha-i şer‘iye ile vekîl nasb ü ta‘yîn eyledim dedikde ol dahi vekâlet-i mezkûreyi kabûl ve hizmet-i lâzımesini kemâ-yenbagī edâya ta‘ahhüd ve iltizâm etmeğin mâ-vaka‘a bi’t-taleb ketb olundu. Fî 7 Şa‘bân sene [1]300 Şühûd: Ahmed Efendi b. Hasan, Mehmed Râşid Efendi b. Mehmed ve gayruhum.